"Dövlət şirkətləri elə bil ki, sosializm iqtisadi modelində işləyir. Bu, dözülməzdir. Sizə tapşırıram, dövlət şirkətlərinin işi ciddi təftiş edilməlidir və yeni idarəetmə sistemi qurulmalıdır".
Bunu bu gün Azərbaycan Prezidenti İlham Əliyev keçirdiyi onlayn müşavirə zamanı bildirib: "Belə davam edə bilməz. Bu nəzarətsizlik bundan sonra belə davam edə bilməz. Artıq müvafiq qurumlar təkliflər paketi hazırlayıb. Mənə də ilkin təqdimat edilib. Mən bunu dəstəkləmişəm. Hökumətə tapşırıq verirəm ki, yaxın günlərdə dövlət şirkətlərinin yeni idarəetmə sistemi ilə əlaqədar mənə lazımi sənədlər təqdim edilsin və imzalayacam".
Bizimxeber.az bildirir ki, müşavirə zamanı Prezident İlham Əliyev “Azərbaycan Hava Yolları” (AZAL)," Azərbaycan Dəmir Yolları" QSC-nin və diğər bir neçə dövlət şirkətinin fəaliyyəti ilə bağlı narazılığını bildirib və yeni idarəetmə strukturunun yaradılmasının vacibliyini diqqətə çatdırıb. Həmçinin bu sistemin yaradılması üçün hökümətdən tezliklə lazımı sənədləri istəyib.
Məlumat üçün bildirək ki, “Azərbaycan Hava Yolları” QSC-nin prezidenti Cahangir Əsgərov, Azərbaycan Dəmir Yolları QSC-nin prezidenti isə Cavid Qurbanovdur. Hər iki məmur barədə uzun illərdir ölkə mətbuatında qalmaqallı iddialar səslənidirılib, bu məmurların fəaliyyətinin şəffav olmadığı barədə saysız məqalələr yazılıb.
Bizimxeber.az
