Talassemiyadan əziyyət çəkən uşaqlar üçün toplanmış pulları ələ keçirməkdə ittiham olunan “Urmedhelp” və “My Doc Tour” adlı şirkətlərin sahibi Nuridə Seyidova və iki işçisi - Aynur Bayramova və Aysel Məmmədovanın cinayət işi üzrə məhkəmə araşdırması davam edir.
Bu gün Bakı Ağır Cinayətlər Məhkəməsində keçirilən iclasda zərərçəkmiş şəxslər vəsatət qaldıraraq ev dustaqlığında olan Aynur Bayramovanın da həbs edilməsini tələb ediblər. Onlar bunu ziyanın ödənilməsinin gecikməsi ilə əlaqələndiriblər.
Azad Məcidovun sədrlik etdiyi hakimlər heyəti zərərçəkmişlərin vəsatətini əsaslı sayıb.
Qərara əsasən, A.Bayramova məhkəmə zalında həbs edilib.
Bundan sonra tərəflər arasında mübahisə yaranıb. A.Bayramova xərçəng xəstəliyindən əziyyət çəkən övladının olduğunu deyərək etiraz edib.
Prosesə ara verilib.
Ancaq sonra həbs edilən A.Bayramovanın vəziyyəti pisləşdiyinə görə proses təxirə salınıb.
Müttəhim konvoyun köməyi ilə cəzaçəkmə müəssisəsinə göndərilib.
Qeyd edək ki, prokuror qətimkan tədbirinin həbslə əvəz edilməsinə ehtiyac görməyib. Lakin hakimlər şəxsin həbsini uyğun biliblər.
Xatırladaq ki, talassemiyalı xəstələrin valideynlərinin Daxili İşlər Nazirliyinə müraciətindən sonra ötən ilin fevralında cinayət işi başlanılıb. Müəyyən edilib ki, Nuridə Seyidova digərləri ilə əlbir olaraq 36 nəfər talassemiya xəstəsinin valideynlərinin etibarından sui-istifadə edərək həmin şəxslərin övladlarını Türkiyədə müalicə etdirmək adı ilə 1 milyon manata yaxın dələduzluq edib. Təqsirləndirilən şəxslərdən Nuridə Seyidova həbsdədir. Digərləri haqda həbsə alternativ qətimkan tədbiri seçilmişdi.
P.S. Xatırladaq ki, qan xəstələri olan uşaqların müalicəsi adı altında 1 milyon manata yaxın valideynlərin pul vəsaitlərini ələ keçirmiş dəstə üzvləri istintaq zamanı da zərəçəkmiş şəxslərə pul ödəmədikləri və mülkiyyətlərində heç bir əmlkaların olmaması üzə çıxmışdır. Verilən məlumatlara görə dələduz dəstənin arxalandıqları yüksək çinli dövlət məmuru hələlik dəstənin azad olunması üçün bütün çirkin üsullardan istifadə etməkdədir ki, onlar azad olunsunlar. Çünki hamıya aydındır ki, yığılan 1 milyon manat pul bu qadınlarda yoxdur. Və ya az bir qismi onlara "xidmət haqqı" kimi verilib. Artıq Aynur Bayramovanın həbsindən sonra məslə köklü surətdə dəyişəcəkdir. Dələduz dəstə üzvləri son ümidləri puça çıxarsa onlar arxalandıqları "Köpəyin" adının çəkilməsinə və özlərinin xilas olmasına çalışacaqlar. Hələlik isə proseslər bu günə qədər onu göstərirdi ki, pulları mənimsəyən əsas dələduz kənardan hakimlərə ciddi təsir etməkdə acizlik çəkir. Belə olmasaydı bu gün digər şəxs olan Aynur Bayramlının da həbsinə qərar verilməzdi. Hadisələri diqqətlə izləyirik. Çox güman ki, dələduz dəstəni qorumağa çalışan "qoruyucu mələyin" kimliyi barədə dəqiq məlumat alacağıq. Hazırda isə bu istiqamətdə araşdırmalatrımız davam edir.
İfadetv.com-un araşdırma qrupu
