Venesuelanın müvəqqəti lideri Delsi Rodrigez ABŞ tərəfindən keçirilən hərbi əməliyyat nəticəsində Prezident Nikolas Maduronun tutulması və ABŞ‑yə aparılmasından sonra ortaya çıxan ittihamlara sərt reaksiya verib.
“Qafqazinfo”nun xəbərinə görə, o bildirib ki, Venesuelanı heç bir xarici casus idarə etmir və ölkədə hakimiyyət yalnız Venesuela hökumətinin əlindədir.
Rodrigez Maduronun ABŞ tərəfindən tutularaq mühakimə olunması ilə bağlı xəbərlərə cavab olaraq deyib ki, ölkədə sülh və sabitliyin təmin olunması hökumətin prioritetidir və xarici qüvvələrin təsiri yoxdur.
“Venesuelanı idarə edən heç bir xarici agent yoxdur”, - o bildirib.
Rodrigez ölkənin daxili işlərinə kimsənin müdaxilə etməyəcəyini vurğulayıb.
Qeyd edək ki, Kolumbiyanın keçmiş vitse-prezidenti Santos Kalderon müvəqqəti prezident təyin olunmuş Delsi Rodrigezi “Maduroya xəyanət edən şəxs” adlandırıb. “Mən onun Maduronu təhvil verdiyinə tamamilə əminəm”, - o deyib.
Kalderonun sözlərinə görə, Rodrigez özünü ABŞ administrasiyasına “Maduro rejiminə məqbul alternativ” kimi təqdim edib.
