Son vaxtlar, daha dəqiq desək 24 fevraldan sonra Ukraynaya qarşı Rusiya Federasiyasının təcavüzkar müharibəsi gedişində Azərbaycanda aqressor ölkəyə xüsusi "simpatiyası" olan bir sıra xəbər saytları verdikləri araşdırma yazılarında, təhlillərində sanki müharibənin vacib olduğunu yerli və rus ictimaiyyətinə təqdim etmək istəyirlər. Sanki müəllif yazıq və məzlum kimi qələmə verməyə çalışan rus imperiyası rəhbərliyinin və onu dəstəkləyən şovinist kütlənin dünyanın gözü qarşısında 41 gün ərzində törətdikləri qətliyamları, vəhşilkləri, zorakılıqları, soyqrım faktlarını görməzlikdən yazır. Və sonda bu qənaətə gəlir ki, belə terroçuluğu yalnız ermənilər həyata keçirə bilər. Nə qədər bəsit, nə qədər ucuz qələmə alınmış bir yazıdır. Biz də həmkarlarımızın faşist imperiyasına haqq qazandıran yazısının motivi barədə bu nəticəyə gəlirik ki, Azrbaycanda fəaliyyət göstərən axar.az kimi bir sıra ruspərəst internet saytlarının vəkillik sövdası səbəbsiz deyildir. Bəli, belə saytları himayə edən, təmənnasız sponsorluq edən Azərbaycanın məşhur generalı məhz nazir Şoyqunun dostudur. Və Şoyqunun tələbi ilə bu yazılar Azərbaycan mediasında işıq üzü görür və ölkəmizi dünya ictimaiyyəti qarşısında hörmətdən salır. Yaxşı ki, Şoyqunun ölkəmizdəki dostunun himayəsində olan saytlardan fərqli olaraq vicdanlı və müstəqil media camesi dünyanın axarı ilə gedərək Ukraynada baş verən həqiqətləri olduğu kimi ictimaiyyətə təqdim edirlər. Budur, sonuncu bir misal. Axar.az bu günki sayındakı təhlili bir daha dəyərli oxucularımız oxuması və nəticə çıxarması üçün yazını olduğu kimi təqdim edirik:
Buça və İrpen dəhşəti: bunu rus ordusu etməyib! deyir.
Buça və İrpenin Rusiya ordusunun işğalından azad olunmasından sonra ortaya çıxan mənzərə dünyanı sarsıdır: hər yer xarabalığa çevrilib, binalar hədəf alınıb, körpülər dağıdılıb, şəhər alt-üst olub, küçələr az qala məhv edilən texnikalardan keçilməzdir... Və əlbəttə ki, əlləri arxadan bağlanmış halda güllələnən yerli sakinlər. Onlardan bəziləri küçənin ortasında, bəziləri zirzəmi döşəmələrindədir.Rus ordusu bu cür qətliam törətməyə qadirdirmi?
Çox güclü daxili əminliklə demək olar: Yox!
Sosial şəbəkələrdə vaxtaşırı olaraq Xocalı yada salınır və Xocalıda 366-cı motoatıcı alayın iştirakı xatırladılaraq, rus ordusunun bu cür qətliamları bacardığına diqqət çəkilir.
Rusiyanın motoatıcı alayı Xocalının işğalında iştirak etmişdi, ancaq orda soyqırımı ermənilər törətmişdilər. Çox yaxın tarixdir, şahidlərin böyük əksəriyyəti sağ-salamatdır, sənədlər, faktlar, sübutlar da – faktı təhrif etməyə və ermənilərin törətdiklərini rus əsgərlərin üzərinə atmağa ehtiyac yoxdur.
Olduqca məntiqli bu arqumentin önünə 20 Yanvar dəhşətini çıxara bilərsiniz. 20 yanvar 1990-cı ildə rus ordusu Bakıda silahsız əhalini gülləbaran etmişdi!
Ancaq bunu da Buça və İrpenlə müqayisə etmək mümkün deyil: 20 Yanvarda rus ordusuna gecə Bakı küçələrində aksiya keçirən dinc əhalinin “silahlı ekstremistlər” olduğu bildirilmiş və atəş əmri verilmişdi, əsgərlər isə icra etmişdilər. Hələ 20 yanvar gecəsi Bakıya girənlərin tamamilə ayrı dəstə olduğu, onları qətliam üçün gətirdikləri, gecə ilə də işlərini bitirəndən sonra çıxarılaraq, əvəzinə ordunun yerləşdirildiyi iddiaları da var.
Buçada isə küçədə və yaxud zirzəmilərdə, “qərargahlarda” güllələnən mülki şəxslərin əli bağlıdır: yəni onlar girov götürülüb, əlləri bağlanıb, işgəncə verilib, sonra güllələnib...
Bu, 20 Yanvardan fərqlidir, Xocalı dəhşətinə yaxındır.
Bu, rus ordusunun imzası deyil!
Xatırlayın o kadrları: hər yerdə rus əsgərlərinə etiraz edən xalq, əliyalın əhali! Onlar rus ordusunun önünü kəsirdilər, Ukraynadan rədd olmalarını tələb edirdilər, bəzi halda rus əsgərlərinin hərbi əməliyyata qoşulması bu cür hadisələrə görə gecikirdi, buna baxmayaraq, rus əsgərləri ukraynalı dinc sakinlərə atəş açmırdı – bir-iki istisnanı çıxmaq şərti ilə.
Ancaq bu kadrlar 10-15 gün əvvələ aiddir - Rusiya Suriya da daxil olmaqla, bəzi ölkələrdən muzdluları, o cümlədən “Vaqner” başkəsənlərini Ukraynaya gətirənə qədər!
Mülki insanın əlini bağlayıb güllələmək yalnız terrorçuların işidir, heç bir ordunun zabiti, əsgəri buna getməz.
Buça və İrpen azad edilməyib, rus ordusu özü ordan geri çəkilib. Əgər nizami ordu komandanlıq qərarı ilə geri çəkilirsə, hər halda arxasınca bu qədər gözgörəsi iz qoymazdı.
Yalnız geri çəkilmək əmri alan terrorçu-muzdlu qruplar heç nə olmamış kimi, küçələrdə əlibağlı meyitləri atıb gedə bilər. Çünki onların təfəkküründə bu, adi mənzərədir.
Buça küçələrində erməni terrorçu təfəkkürünün imzası açıq-aydın görünür: bu cür qətliam üçün yalnız erməni olmaq lazımdır!
P.S. Qəribə bir məqama da diqqət çəkmək gərək: öldürülənlərin bir çoxunun əli niyə yalnız ağ parça ilə bağlanıb? Fotoya aydın düşməsi üçün? O ağ parçalar niyə çirklənməyib?
Bu şübhələr qətliamı və qətliamın məsuliyyətini azaltmaq üçün deyil – qətiyyən!"