Dünyada bir peşə var ki, o peşənin sahibləri hər bir cəmiyyətin, hər bir fərdin həyatında əlahiddə rol oynayır, insanların mənəvi və əqli inkişaf səviyyəsini müəyyən edir, yetkin bir vətəndaşa çevrilməsinə töhfə verirlər. Söhbət, əlbəttə ki, müəllimlərdən gedir! YUNESKO-nun qərarı ilə 1994-cü ildən başlayaraq hər il oktyabr ayının 5-i Ümumdünya Müəllimlər Günü kimi qeyd olunur. Müəllim adı tarixən həmişə fədakarlıq, əzm, vətənə və millətə sevgi, insanpərvərlik anlayışları ilə birgə xatırlanıb. Müəllim olmaq ona görə şərəflidir ki, müstəqil Azərbaycanımızın gələcəyinin daha möhkəm təməllər üzərində qurulması yolunda onların əməyi ölçüyəgəlməzdir. Möhtərəm Prezidentimiz İlham Əliyevin sərəncamları ilə hər il Beynəlxalq Müəllimlər Günü ərəfəsində bir çox müəllim fəxri ada, dövlət təltiflərinə layiq görülür. Bu il də Beynəlxalq Müəllimlər Günü ilə əlaqədar Biləsuvar rayonunda 5 oktyabr-Müəllimlər gününə həsr olunmuş tədbir keçirildi.Tədbirdə Azərbaycan Respublikası Prezidentinin 03 oktyabr 2019-cu il tarixli Sərəncamı ilə rayonun müəlliməsi Əhədova Aybəniz Babaxan qızına “Əməkdar müəllim” fəxri adı verilməsi qeyd edilərək rayon rəhbərliyi tərəfindən təbrik edilmişdir. Mükafat alanları, o cümlədən Biləsuvar rayon Bəydili kənd tam orta məktəbinin müəlliməsi Aybəniz Əhədovanı “Əməkdar müəllim” fəxri adına layiq görülməsi münasibətilə bizdə təbrik edir, möhkəm cansağlığı və şərəfli işlərində daha böyük uğurlar arzulayırıq.
Emil Bədəlbəyli
