Bakıda xarici ölkə səfirliklərinin, şirkətlərin və beynəlxlaq təşkilatların ofislərinin yerləşdiyi “Landmark” Biznes Mərkəzinə məxsus 3 bina "Aqrarkredit" QSC-yə satılıb.
Bu barədə “Gününsəsi.info” məlumatlı mənbəyə istinadla xəbər yayıb. Qeyd olunur ki, bu gün səhər binada yerləşən qurumlarda çalışan əməkdaşlar ora daxil ola bilməyiblər. Onların giriş kartları deaktiv edilib. Həmçinin Mərkəzin bütün əməkdaşları kütləvi şəkildə işdən çıxarılıb.
Xatırladaq ki, binada Avropa İttifaqının Bakıdakı nümayənəliyi, Hollandiya, Venesuela, Litvanın səfirlikləri, həmçinin məşhur “Boston Consulting”, “Procter amd Gamble” şirkətlərinin ofisləri yerləşirdi.
“Landmark” Biznes Mərkəzi 1990-cı illərin sonunda Bakının mərkəzində “köhnə dəyirman” deyilən ərazidə Şimali Kiprdən olan mühəndis və tanınmış iş adamı Efruz Sami Müdüröğlu tərəfindən inşa edilib. Onun oğlu Eran Müdüroğlu bir müddət əvvəl Biznes Mərkəzini 120 milyon dollara hərraca çıxarmışdı. Amma binanın sahibləri onu hərraca çıxaran şirkətin fəaliyyətində qanunsuzluqları əsas gətirərək Ədliyyə Nazirliyindən hərrac prosesini dayandırmasını, başqa şirkətə ötürülməsini xahiş etmişdilər.
Qeyd edək ki, Müdüroğlu ailəsinin ölkəmizdəki biznesinin qanuni təmsilçisi Nərgiz Nəsrullayevadır. O, 1996-2001-ci illərdə Azərbaycanın İqtisadiyyat naziri, 2001-2007-ci illərdə Hesablama Palatasının 1-ci sədri vəzifəsində çalışmış Namiq Nəsrullayevin qızıdır. Nərgiz Eran Müdüroğlunun həyat yoldaşıdır. O, Dövlət Neft Fondu icra direktorunun müşaviri vəzifəsində çalışıb. Ötən il N.Nəsrullayeva həyat yoldaşı ilə birlikdə vətəndaşı olduqları Avropa ölkələrindən birinə gedib.
“Landmark” Biznes Mərkəzinə aid binaları alan “Aqrarkredit” QSC bank olmayan kredit təşkilatına (BOKT) gəlincə, ona uzun müddət ölkədə “Şapka Mamed” ləqəbi ilə tanınan Məmməd Musayev rəhbərlik edib. Bu təşkilat 2015-ci ildə Beynəlxalq Bankla bağlı yaranmış korrupsiya qalmaqalından sonra onun milyardlarla dollarlıq kreditlərini qaytara bilməyən müəssisələrə nəzarəti ələ keçirib. Dünən isə “Aqrarkredit” QSC səhmdarlarının növbədənkənar ümumi yığıncağı keçirilib, qurumun İdarə Heyətinin (İH) yeni tərkibi təsdiq edilib.(Gününsəsi.info)
Maliyyə Nazirliyinin yaydığı məlumata görə, “Şapka Mamed” və ətrafı qurumun rəhbərliyindən kənarlaşdırılıb.
