Yerli mənbənin verdiyi məlumata görə dünən Şəki Şəhər Polis Şöbəsinin DYP baş inspektoru, baş leytenant Ramil Vaqif oğlu Adamov sərxoş vəziyyətdə idarə etdiyi xidməti avtomobili yüksək sürətlə ağaca vuraraq ağır qəza törətmişdir. Qəza nəticəsində qolları, qıçı və sir-sifəti sınmışdır. Onu təcili olaraq Bakıya DİN-nin hospitalına çatdırmışlar. Bu həmin DYP işçisidir ki, sonuncu dəfə şəhid ailəsi olan Aşağı Göynük kənd sakini Sadiq Əbdürəhimova 10 manat cəriməsi olduğuna görə 200 manat rüşvət verməsini tələb etmiş, niyyəti baş tutmadıqda isə ona məxsus Niva markalı avtomobilini qanunsuz olaraq qaçırmışdır. Şikayət etdiyinə görə xeyli maddi ziyana düşən R.Adamov S.Əbdürəhimovun əmisioğlu Mehdi Əbdürəhimovun mobil telefonuna zəng edərək şikayətini geri götürməyi tələb etmiş, və hədə-qorxu gəlmişdir. Şikayət geri götürülmədikdə isə noyabrın 19-da onun sifarişi əsasında şəhid ailəsi vəhşicəsinə döyülmüş, ağır bədən xəsarətləri almışdır. Baş vermiş hadisəni isə Şəki polis təhqiqatçıları və prokurorluğun müstəntiqi ört-basdır etmişlər.
Xatırlatmaq yerinə düşərdi ki, 2017-ci ilin oktyabrın 16-da R.Adamov “Region-Şəki”nin müxbiri, Şəki sakini Nicat Mirzəxanlını huşu itənədək Polis Şöbəsinə gətirərək vəhşicəsinə döydüyünə görə Şəki Polisində 102 xidmətinə daxil olan zəng əsasında Şəki Mərkəzi Xəstəxanasında araşdırma aparılmış və iş sonradan ört- basdır edilmişdir. R.Adamovun bizlərə məlum olan törətdiyi digər qanunazidd hadisə isə 11 iyun 2019-cu il tarixində Şəki şəhərində taksi sürücüsü Akif Məsimova qarşı olmuşdur. Balə ki, polis R.Adamovun törətdiyi zorakılığa etiraz edən A.Məsimov özünə çoxsaylı bıçaq zərbələri vurmuş və sürücünün həyatını xəstəxanada edilən cərrahi əməliyyat zamanı xilas etmək mümkün olmuşdur. Hadisə ilə bağlı Şəki Prokurorluğunda R.Adamovun işi araşdırılmış və o birtəhər “canını” qurtarmışdır. A.Məsimov məsələilə bağlı 2019-cu ilin sonunda Şəkidə Daxili İşlər nazirinin qəbulunda olmuşdur. Azərbaycan sürücülərinə qarşı amansız və qəddar rəftarına baxmayaraq R.Adamov DİN-nin Baş Dövlət Yol Polisi İdarəsində çalışan həmkəndlisi olan ( Dəhnə kəndi) yüksək vəzifəli şəxsin himayəsi altında indiyədək fəaliyyətini davam etdirə bilmişdir. Baxmayaraq ki, son illər onun barəsində cinayət xarakterli şikayətlərin ardı arası kəsilməmişdir. Budur, nəhayət DYP işçisi sərxoş vəziyyətdə xidməti avtomobili yüksək sürətlə idarə edərək ağaca çırparaq ağır qəza keçirmişdir. Güman edirik ki, bu dəfə də onun DYP-nin baş idarəsində oturan “qoruyucu mələyi” cənab Ramiz Zeynalovdan 10-cu dəfə səhvinin bağışlanmasını xahiş edəcək.
İfadetv.com
