Dünən gecədən başlayan və hazırda davam edən güclü yağış Bakının demək olar ki, bütün küçə və prospektlərində əməlli başlı fəsadlar yaradıb. Yağış sularının axını üçün lazım olan drenajların, kanalizasiya xəttlərinin normal fəaliyyət göstərməməsi səbəbindən avtomobil yollarına yığılan su nəqliyyatın hərəkətini iflic edib. Məsələn, Sabunçu rayonu, Komsomol dairəsindən Zabrat istiqamətində, aeroport yoluna paralel istiqamətdəki əlavə yol qarşıdakı yeni tunelə qədər su dolmuşdur. Xatırladaq ki, həmin istiqamətdə yolun yenidən asfaltlanması zamanı hamarlığın bərpası məqsədilə yol işçiləri bir sıra kanalizasiya qapaqlarının üstünü asfalt-betonla örtmüşlər. Digər lüklərdən yol boyu fontan verən çirkab suları da yağışa qarışaraq süni sel əmələ gətirmişdir.
Digər tərəfdən, yağış suları paytaxtın müxtəlif istiqamətlərində yaşayış evlərinə dolaraq sakinlərə çətin anlar yaşadıb. Bakının Xətai rayonu, Naximov küçəsində, Sabunçu rayonun Ramana qəsəbəsində yaşayış evlərinin həyətini su basıb, hazırda vətəndaşlar nə edəcəklərini bilmirlər çarəsiz durumdadırlar. Bakının bir çox küçələrində su basmaya görə əsasən köhnə avtomobillər xarab olub küçələrdə qalıb.Nəticədə nəqliyyatın hərəkəti demək olar ki, bir çox istiqamətlərdə iflic olub.
Xatırladaq ki, istər yolların çıkilişi üçün, istər yeni drenaj sistemlərinin qurulması və təzlənməsi, istərsə də suötürücü sistemlərin yenilənməsi üçün son illərdə dövlət büdcəsindən 100 milyonlarla manat vəsaitlər ayrılmışdır. Çox təəssüflər olsun ki, bu pulların çox hissəsi reallıqda layihəsiz, plansız olaraq keyfiyyətsiz, süni asfalt-beton örtüyünün – çəkilməsi adı altında AAYDA ( Yəni, Azərbaycana Ayrılan Yolların Dağıdılması Ailə şirkəti) –nın rəhbərliyində çalışan bir qrupun ailə şirkəti tərəfindən mənimsənilir. Eləcə də bu proses Su-Kanalizasiya və Bakı şəhər İcra Hakimiyyətində baş verməkdədir. Budur, bu gün baş verən təbiət hadisəsi dövlət idarələrini ailə şirkəti kimi idarə edənlərin paxırını açdı.
Tezliklə yaranmış ciddi problemin həlli istiqamətində aidiyyəti qurumların təcili və təxirəsalınmaz tədbirlər görəcəyinə inanmasaq da, törədilmiş irimiqyaslı korrupsiya hallarına aidiyyatı təşkilatlar tərəfindən son qoyulacaqdır.
İfadetv.comun araşdırma qrupu
