İsrail oktyabrda İranın İsrail şəhərlərinə raket hücumlarına cavab olaraq, bu ölkənin yalnız hərbi və kəşfiyyat obyektlərini vurmağa hazırdır.
Gununsesi.info xəbər verir ki, bu barədə “The Washington Post” (WP) və “The Wall Street Journal” (WSJ) qəzetləri məlumat yayıb. Məlumata görə, İsrailin baş naziri Benyamin Netanyahu Yaxın Şərqdə daha da gərginləşmənin və neft qiymətlərinin artmasının qarşısını almaq üçün ABŞ prezidenti Co Baydenə telefon danışığı zamanı bu vədi verib. Bundan əvvəl İsrail hakimiyyəti İranın nüvə və neft obyektlərinə zərbə endirmək variantını da nəzərdən keçirib.
“The Wall Street Journal” qəzetinin həmsöhbətlərinin sözlərinə görə, oktyabrın 8-də telefon danışıqları zamanı Netanyahu konkret hədəflər göstərməsə də, İranın hərbi və kəşfiyyat obyektlərinə məhdud raket zərbəsi endirmək niyyətində olduğunu açıqlayıb.
İddia edilən hücum İsrail hava qüvvələrinin Livanın “Hizbullah” qruplaşmasının lideri Həsən Nəsrullahı öldürən Beyruta hava hücumu həyata keçirdikdən sonra oktyabrın 1-də İranın İsrailə 200-ə yaxın raket atmasına cavab olacaq.
Nəşrlərin yazdığı kimi, amerikalılar İsrailin İranın neft və nüvə hədəflərinə cavab hücumunun Yaxın Şərqdə genişmiqyaslı müharibəyə səbəb ola biləcəyindən və ABŞ-ın sonradan bu işə qarışmaq məcburiyyətində qalacağından qorxurlar.
“The Washington Post” qeyd edib ki, vəziyyətin bu inkişafı noyabrın 5-də keçiriləcək prezident seçkilərində demokratların namizədi Kamala Harrisə böyük ziyan vuracaq və respublikaçı Donald Trampın qalib gəlməsinə yardım edəcək.
Məlumata əsasən, İsrailin ilkin məqsədlərindən əl çəkməsi, oktyabrın 13-də Pentaqonun elan etdiyi kimi, Vaşinqtonun özünün təkmil THAAD raketdən müdafiə sistemini İsrailə göndərməsi üçün həlledici oldu.
Bundan əvvəl “Financial Times” hərbi ekspertlərə istinadla yazıb ki, ABŞ-ın İsrailin ehtiyaclarını tam ödəyə bilməməsi səbəbindən İrandan iri raket hücumu zamanı İsrailin raketdən müdafiə sistemi potensial olaraq kəsici raket çatışmazlığı ilə üzləşə bilər.
“The Wall Street Journal” yazır ki, İsrailin İrana cavab hücumu, çox güman, noyabrın 5-də ABŞ-da keçiriləcək seçkilərdən əvvəl baş verəcək və İsrail hərbi hava qüvvələrinin apreldə İran hərbi bazalarına endirdiyi zərbəni xatırladacaq.
Eyni zamanda, nəşr qeyd edir ki, İsrail Hərbi Hava Qüvvələri İranda “gözlənilməz hədəfləri” vura bilər.
Hərbi ekspert və hava hücumundan müdafiə qüvvələrinin tarixçisi Yuri Knutov hesab edir ki, böyük ehtimalla, İsrailin cavab zərbəsi məhdud xarakter daşıyacaq və nümayişkaranə təsir göstərəcək.
Onun fikrincə, hazırda İsrail rəhbərliyi eskalasiyada maraqlı deyil və Amerika administrasiyasının tövsiyələrinə əməl etməyə məcburdur.
Ekspert hesab edir ki, nəzəri olaraq İsrail Hərbi Hava Qüvvələri İranın raket bazalarına və raket və pilotsuz təyyarələrin istehsal olunduğu fabriklərə zərbələr endirə bilər.
“Bundan əlavə, İsrailin hücumu zamanı nüvə infrastrukturu ilə dolayısı ilə bağlı obyektlər və kadr hazırlığı ilə məşğul olan təhsil ocaqları da zədələnə bilər”, – deyə o vurğulayıb.
Knutov qeyd edib ki, Tehran son illərdə hava hücumundan müdafiə sisteminin modernləşdirilməsi üzərində ciddi şəkildə çalışsa da, İsrailin hava hücumu halında İranın strateji hədəfləri zədələnə bilər.
HSE Şərqşünaslıq Məktəbinin baş müəllimi Andrey Zeltin isə bildirib ki, İsrail rəhbərliyində cavab zərbəsinə ehtiyac və ya onun üsulları ilə bağlı birlik yoxdur.
“Ola bilsin ki, İsrail kiberhücumla məhdudlaşacaq və bir müddət İranın bank sektorunu sıradan çıxarmağa çalışacaq”, – deyə o əlavə edib.
Ekspert onu da xatırladıb ki, bundan əvvəl İsrail kəşfiyyat xidmətləri uranın zənginləşdirilməsi üçün İran sentrifuqalarını sıradan çıxarıb.
