Xəbər verildiyi kimi dünən Şəki şəhərinin mərkəzi küçələrində gəzişən qonur ayı səhər saat 4-dən günorta saatlarınadək küçədə çox mədəni formada var-gəl etmiş, insanlara hər hansı təhlükə yaratmamışdır. Onun boynunda olan izdən məlum olur ki, ayı heç də rəsmilərin dediyi kimi dağdan enib çay axarıilə şəhərə daxil olmayıb. Ayı sadəcə olaraq saxlandığı yerdə boyunbağını qırmış və sakitcə saxlandığı məkanı tərk etmişdir.
Verilən məlumata görə ayı Şəkinin mərkəzində yaşayan imkanlı bir şəxsin həyət evindən çıxıb qaçmışdır. Həmin yerdə bu ayıdan başqa daha 4 ayının da olduğu bildirilir. Yaxın bir neçə gündə ayının əsil sahibinin kimliyi barədə dəyərli oxucularımıza məlumat verəcəyik. Çağrılmamış "qonq"la bizi baş vermiş hadisənin digər tərəfi çox narahat etdi. Ayının Şəkinin ən imkanlı məhəlləsində peyda olması və gəzintidən və aclıqdan yorularaq elə asfaltın üstündəcə yuxuya getməsi Şəki əhlinin iqtisadi vəziyyətini tam çılpaqlığıilə bütün dünyaya nümayiş etdirdi. Belə ki, ayını müşahidə edən yerli əhali və polis qüvvələrindən heç kim ac və yorğun ayıya nə bir vedrə su, nə də bir parça quru çörək təklif etmədi. Biz bu məsləilə bağlı ayının var-gəl etdiyi Şəkinin məşhur"Qurcana" kafesinin müdiri Vahid Süleymanovla əlaqə saxladıq. Vahid bildirdi ki, bəli. indi Şəkidə hamı ayıdan danışır. Amma dünənə qədər icra başçısının əmlakları və villaları əsas mövzu idi. O etiraf etdi ki, həqiqətən ayıya bir qonaq olaraq şəhər camaatı heç bir yemək təklif etmədi. Bu heç yaxşı olmadı. Ekologiya Nazirliyinin əməkdaşları da gəlib zorla ayını avtomobilə mindirib ac-susuz Xızıya apardılar.
P.S. Bir sözlə, ayı Şəkiyə qəfil gəlişilə həm də yerli insanların özlərinin hansı iqtisadi vəziyyətdə olmalarını tam çılpaqlığıilə dünyaya bəyan etdi.
