ƏSAS SUAL BUDUR:  “Niyə ancaq eyni adamlar?”

Qazaxıstan prezidenti Qasım-Jomart Tokayev ölkəsindəki monopoliya və oliqarxiyadan danışıb.

Tokayevin sözlərinə görə, biznesin bir əldə cəmləşməsi dövlət üçün təhlükəli tendensiyadır.
Prezident xatırladıb ki, İslahatlar üzrə Ali İqtisadi Şuranın iclaslarının birində o, artıq Qazaxıstanda oliqopoliya olduğunu demişdi.
"Yanvarın 11-də parlamentdə də eyni tezisi təkrar etdim. Ümid edirəm ki, burada iştirak edən hər kəs oliqopoliyanın klassik tərifini bilir. Biznesin bir əldə nəhəng şəkildə cəmləşməsi və eyni vaxtda onunla məşğul olmaq imkanı olan başqa insanlarla imkan tanınmaması bütün dövlətlər üçün ən təhlükəli tendensiyadır.
Bizdə isə bu, xüsusi qüvvə ilə özünü büruzə verirdi. Oliqopoliya ölkə iqtisadiyyatını şaxələndirmək deyil, eyni əllərdə biznesi şaxələndirmək istəyidir. Yəni, eyni şəxs və ya eyni şirkət emal edir, bankları idarə edir, bir dəstə başqa biznesi həyata keçirir, qalanları isə kənatda qalır, - Tokayev biznes nümayəndələri ilə görüşdə deyib.
Prezident deyib ki, biznesin monopoliyaya alınması Qazaxıstan əhalisi arasında sosial depressiya doğurub.
"İnsanlar sual verirlər ki, niyə bütün biznes növləri eyni əllərdə cəmləşib. Bu depressiyaya, cəmiyyətdə ədalətə inamsızlığa səbəb olur”, - deyə dövlət başçısı əlavə edib.

Dərs çıxarmalı müsahibə: Prezident gələcəyin konturlarını cızdı 

Prezident İlham Əliyevin yanvarın 12-də yerli televiziya kanallarına müsahibəsi bir çox mühüm məqamlarla diqqət çəkdi. Dövlət başçısı müsahibə zamanı Azərbaycanda 2021-ci ildə iqtisadi, sosial sahələrdə görülən işlərə, Azərbaycanla Ermənistan arasında münasibətlərə, işğaldan azad edilmiş ərazilərdə aparılan yenidənqurma işlərinə, ölkəmizin xarici siyasətinə və digər məsələlərə dair sualları cavablandırdı. Prezident İlham Əliyev müsahibəsində bir çox önəmli mesajlar verdi. Ölkə lideri verdiyi mesajlarla post-müharibə dövründə Azərbaycanın hədəf və məqsədlərini ortaya qoydu.  Bu müsahibədə önəmli olan məslələrdən biri də ölkədə monopoliyanın və digər qanunsuz halların qarşısının alınması üçün dövlət başçısının mətbuatın və ictimai nəzarətin gücləndirilməsinin vacib olduğunu vurğulaması idi.

Dövlət başçısı müsahibəsində ölkənin iqtisadi inkişafı barədə də danışıb, ötən ilin göstəricilərinə dair bəzi rəqəmləri açıqlayıb, sosial-iqtisadi islahatların davam etdiriləcəyini deyib, qanunsuz əməllərə yol verən məmurların cəzalandırılacağını, heç kimin məsuliyyətdən kənarda qalmayacağını bildirib. Prezident ictimai nəzarətin gücləndirilməsinin vacibliyini vurğulayıb, bunun bir çox məmurları cinayət xarakterli işlərdən çəkindirəcəyini, ona görə də ictimai nəzarətin hansısa institusional formatının da işlənilməli olduğunu qeyd edib.
Dövlət başçısı bu məsələdə medianın rolunu xüsusilə qeyd etməsi mətbuatın “dördüncü hakimiyyət” funksiyasının bərpası mesajı kimi də dəyərləndirilə bilər. İlham Əliyev ölkənin demokratikləşməsini istəyir və bu prosesə vətəndaş cəmiyyətini də dəvət edir. Dövlət qurumlarının hesabatlığının və şəffaflığının təmin edilməsi üçün zəruri mexanizmlərin hazırlanması, təcrübədə tətbiqi vətəndaş cəmiyyətinin başlıca fəaliyyət istiqamətlərindən biridir. Prezident istəyir ki, vətəndaş cəmiyyəti institutları bu məsələdə daha aktiv rol oynasın. Savaşda qalib gələn, bütün mühüm layihələrin vacib iştirakçısı olan Azərbaycan daxili siyasətin də müəyyən korrektlər edir. Prezident İlham Əliyev demokratik açılıma gedir və bu istiqamətdə media və vətəndaş cəmiyyətini əməkdaşlığa səsləyir.

İFADETV.COM