Rusiya Federal Aviasiya Agentliyi rusiyalı muzdluların lideri, “Vaqner” qrupunun rəhbəri Yevgeni Priqojinin ölümünü rəsmən təsdiqləyib.
Hurriyyet.az xəbər verir ki, o, avqustun 23-də Moskvanın şimal-qərbində – Tver vilayəti ərazisində qəzaya uğrayan təyyarənin sərnişinlərindən biri olub.
Xatırladaq ki, Rusiyanın Tver vilayətində qəzaya uğrayan şəxsi təyyarədə “Vaqner”in rəhbəri Yevgeni Priqojin, muzdluların hərbi komandiri Dmitri Utkin, Priqojinin böyük köməkçisi Valeri Çekalov, daha dörd sərnişin (onların arasında “Vaqner”in erməni əsilli üzvü Yevgeni Makaryan da olub–red.) və təyyarənin idarəetmə ekipajı olub.
Dublin Universitetin beynəlxalq siyasət professoru Skott Lukas “Amerikanın Səsi” ilə söhbətində qəzanın təsadüfi olmasını çətin hesab edib:
“Qərb, Amerika və Avropa kəşfiyyat xidmətləri təyyarənin zenit raketi ilə vurulduğunu bildirir. Baş verənlərin sadəcə bir səhv olduğuna inanmaq çətindir. Bu, sifarişli əməliyyat idi. Məqsədli qətl”.
Lukasın sözlərinə görə, əgər təyyarə qəsdən məhv edilibsə, deməli biz bunun Putinin mesajı olmasını anlamalıyıq:
“Putin bununla da Rusiya hərbi, siyasi və iqtisadi elitasına mesaj göndərib”.
Qeyd edək ki, Priqojinin olduğu güman edilən təyyarə “Vaqner” liderinin Rusiya hərbi rəhbərliyinə qarşı silahlı üsyan qaldırmasından düz iki ay sonra qəzaya uğrayıb. Yevgeni Priqojin və onun rəhbərlik etdiyi qüvvələr sonradan Belarusa keçməyə icazə alıblar.
ABŞ-ın Orta Tennessi Dövlət Universitetinin Rusiya üzrə eksperti Andrey Korobkov isə deyib ki, o, Priqojinin ölümünə heç də təəccüblənmir:
“Düz iki ay keçdi, çox simvolik bir addım. Mən daim deyirdim ki, Priqojin məhvə məhkumdur. O, Kremlin ən mühüm qaydasını pozmuşdu: liderə sadiq qalmamışdı. İki ay əvvəl baş verənlər Putin üçün utancverici idi. Ona görə də bu qəza gözlənilən idi”.
Korobkov əlavə edib ki, “Vaqner” rəhbərinin ölümü Rusiya prezidenti Vladimir Putinin xeyrinə olsa da, çətin ki, Ukraynada döyüşən Rusiya ordusuna kömək etsin.
Onu da xatırladaq ki, Putin təyyarə qəzasında həlak olanların ailələrinə başsağlığı verib və Priqojinin “bir sıra ciddi səhvlərə yol verən” “istedadlı insan” olduğunu qeyd edib.
yenisabah.az
