“Ermənistanda vəziyyətin gərginləşməsi gözlənilən idi. Çünki hazırda Paşinyana qarşı iki qrup mübarizə aparır. Bunlardan biri Putinə söykənən Robert Köçəryan və onun klanıdır. Digəri isə prosesə bir qədər gec qoşulmuş və Rusiyanın hərbi dairələrinə bağlı keçmiş prezident Serj Sarkisyanın klanıdır”.
“AzPolitika.info” xəbər verir ki, bunları politoloq Ərəstun Oruclu Ermənistanda cərəyan edən hadisələri şərh edərkən bildirib. Ekspertin sözlərinə görə, Ermənistanda müxalifətin təşkil etdiyi mitinqlərə az adamın gəlməsi göstərdi ki, N.Paşinyanı xalq gücü ilə devirmək mümkün olmayacaq: "Ona görə də Serj Sarkisyan "İskəndər" raketləri ilə bağlı provakativ sualı ortaya atdı və bununla Paşinyanı hərbçilərlə konfliktə çəkdilər. Belə görünür ki, Ermənistan Baş Qərargahı Rusiyanın hərbi dairələrindən tapşırıq alıb və onlar indi Paşinyanı silah gücünə devirmək istəyirlər. Devirə biləcəklərmi, bu, çox böyük sual altındadır".
Ə.Oruclunun fikrincə, revanşist qüvvələrin hakimiyyətə gələcəyi halda da, Ermənistan 10 noyabr sazişindən çıxmayacaq: "Onlar, sadəcə olaraq, həmin bəyanatı məğlubiyyət kimi qiymətləndirib günahı Paşinyanın üzərinə qoyacaqlar".
Politoloq vurğulayıb ki, Qarabağda müharibənin alovlanması təhlükəsi qalmaqdadır: "Nəzərə alsaq ki, Qarabağ problemi hələ bitməyib, Rusiya Qarabağ müharibəsində özünün istədiyi hədəflərə tam çatmayıb, yəni, Qarabağ üzərindən Yaxın Şərqə çıxışını tam əldə edə bilməyib, Qarabağda müharibə təhlükəsi qalır. Üstəlik də revanşist qüvvələri hakimiyyətə gətirənlər onlara müəyyən uğurları qazandırmağa çalışacaqlar".
“AzPolitika.info”
