Rusiya qoşunları cümə axşamı səhər Ukrayna ərazisini yenidən raket zərbələrinə məruz qoyub. Bundan əvvəl gecə pilotsuz uçuş aparatlarının hücumları olub.
“AzPolitika.info” Ukrayna mediasına istinadla xəbər verir ki, partlayışların Dnepropetrovsk, Zaporojye və Kiyev vilayətlərində, həmçinin Odessa yaxınlığında və Vinnitsa vilayətində baş verdiyi bildirilir. Kiyevin meri Vitali Kliçko Ukraynanın paytaxtında düşən raketlərlə bağlı açıqlama verib.
Kiyevin Qoloseyevski rayonunda bir nəfər ölüb, iki nəfər yaralanıb. Hakimiyyət orqanlarının ilkin məlumatlarına görə, raket parçaları qeyri-yaşayış binasına düşüb.
Odessa vilayətində isə səlahiyyətlilər iki mühüm infrastruktur obyektinin vurulduğu barədə məlumat veriblər. Bir sıra regionlarda, o cümlədən Kiyev, Vinnitsa və Odessada elektrik enerjisinin verilişində fasilələr başlayıb.
Ukrayna Silahlı Qüvvələrinin Baş Komandanı Valeri Zalujnı ölkə üzrə ümumilikdə 55 raketin, o cümlədən 2 hipersəs “Kinjal” raketinin atıldığını bildirib. O, hava hücumundan müdafiə sistemi ilə 47 raketin vurulduğunu bildirib. Rusiya komandanlığı zərbə barədə hələlik məlumat verməyib.
Xatırladaq ki, Rusiya sonuncu dəfə yanvarın 14-də Ukrayna ərazisinə irimiqyaslı raket hücumu edib. Raketlərdən biri Dneprdə yaşayış binasına düşüb. Ən azı 40 nəfər ölüb. Rusiya Müdafiə Nazirliyi raket hücumunun “Ukraynanın hərbi komandanlıq və idarəetmə sisteminə” edildiyini bəyan edib.
Ukrayna Silahlı Qüvvələrinin Hərbi Hava Qüvvələri Komandanlığı daha əvvəl bəyan etmişdi ki, yanvarın 26-na keçən gecə buraxılan 24 “Şahed” pilotsuz aparatının hamısı vurulub. Bununla belə, dronlardan biri Dneprdə sənaye obyektinə düşüb.
Rasim Əliyev