Naxçıvanın səhiyyə naziri olan Samiq Sadıqov səhiyyəni elə hala salıb ki, vəziyyəti sağlamlaşdırmaq üçün xeyli çalışmaq lazım gələcək. Bu barədə "Dia-az"a göndərilən məqalədə deyilir.
Məqalədə daha sonra bildirilir: "Bu şəxs Ali Məclisin keçmiş sədri Vasif Talıbovun kadrlarından hesab edilir. Onun vaxtında iş karyerasını qurmağa başlayıb, yüksək vəzifələrə təyin olub. Samiq Sadıqov Vasif xanın gedişindən sonra da toxunulmazlığını qoruya bilib.
İndi də muxtar respublikada əsas söz sahiblərindəndir. Naxçıvan səhiyyə sistemində nə edibsə, şikayət şikayətin ardınca olunur. İndi də Şərur camaatı nazirin əlindən dad edirlər. Şikayətçilərdən biri təcili yardımın yarıtmaz işindən danışır.
Deyir ki, Şərur Rayon Mərkəzi Xəstəxnasının tərkibindəki təcili yardım stansiyasının həyətində ən azı 6 ədəd ambulans avtomobili dayansa da, faktiki olaraq əhaliyə iki maşın xidmət göstərir. Qalanlarının təmirə ehtiyacı var. Amma heç kim bu məsələni həll etmir. Nəticədə əhali əzab çəkir. Xəstələr təcili yardımı gözləyə-gözləyə qalırlar.
Şərurdan yazılan növbəti şikayət bir uşaq barəsindədir. Bu uşaq anadangəlmə xəstədir. Beldən aşağı nahiyələri hissiyyatdan məhrumdur. Başında böyümə var, həm də laldır. Uşağın anası Dürdanə xanım övladına pensiya almaq üçün Şərur Rayon Mərkəzi Xəstəxanasına müraciət edib. Dediyinə görə, ona bildiriblər ki, 600 manat ver, ömürlük pensiya düzəldək.
O da həmin məbləği verməyib, həm də etiraz edib. Buna görə də uşağı ümumiyyətlə pensiyadan məhrum ediblər. Cənab nazir Samiq Sadıqov, bu ailənin vəziyyəti çox acınacaqlıdır. Ailə başçısı yoxdur. Dürdanə xanımın iki uşağı var, ikisi də sağlamlığını itirib. Anası onkoloji xəstədir.
Ailə alimentin ümidinə qalıb. Güc-bəla ilə yaşayırlar. Şərur RMX-nin baş həkimi Asiman Yusifovun başı qara işlərə o qədər qarışıb ki, ağı qaradan ayıra bilmir. Xəstəni sağlam, sağlamı xəstə kimi qələmə verir. Tibbi-Sosial Ekspertiza Komissiyasının rəhbəri Ramiz doktorla əl-ələ verib yığılan pulları bölməklə məşğuldurlar. Onları xəstə uşağın halı, təcili yardım maşınlarının nasazlığı maraqlandırmaz.
Maraqlı olduqları bir şey var: pulun miqdarı. Baş həkimlə TSEK rəhbəri xəstəliyə görə pensiyaya çıxartmaq üçün vətəndaşlardan 1500 manat istəyirlər. Açıq bazardı. İstədikləri qiyməti qoyurlar. İmkanlı-imkansıza baxmırlar. O qədər pul hərisliyi var ki, dövlətin ayırdığı pulsuz dərmanları, şəkərli diabetlər üçün preparatları da mənimsəyirlər. İş o yerə çatıb ki, insanlar keçmişi yada salıb Vasif Talıbovun bunlarla müqayisədə daha mərhəmətli olduğunu deyirlər.
Artıq Şərur Regional Tibb Mərkəzi və onun tabeli qurumu olan Rayon Mərkəzi Xəstəxanasında bəzi yeyinti hallarının aşkarlandığı məlum olub. Beləki, daxili depodan külli miqdarda dərman və başqa tibbi ləvazimat çıxarılaraq xəstələrin adına yazılıb sənədlərlə silinmiş, daha sonra müəyyən əcxanalara satılıb çoxlu gəlir əldə edilmişdir.
Bu işdə baş həkim Asiman Yusifov və Samirə adlı baş tibb bacısının adları çəkilir. Onlar şöbələrin böyük tibb bacılarının vasitəsilə dövlət əmlakını satmaqla məşğul imişlər. Bu faktları Naxçıvan səhiyyə nazirinin göstərişi ilə yaradılmış komissiyanın da təsdiq etdiyini bildirirlr. Məlumata əsasən artıq istintaq başlanıb".
Dia-az
