SAATIN ƏQRƏBİ KƏMALƏDDİNİN ÜZƏRİNDƏDİR
Fövqəladə Hallar naziri Kəmaləddin Heydərovun nüfuz və təsir dairəsi sürətlə daralır. Bunu son aylarda baş verən bir-birindən ilginc hadisələr də təsdiqləyir.
"Unikal" qəzetinin bugünkü sayında yazılıb ki, 9 fevralda baş tutan parlament seçkisində Heydərova yaxınlığı ilə bilinən bir çox şəxslər parlamentdən kənarda qaldı. Məsələn, müğənni Zeynəb Xanlarova ümumiyyətlə namizədliyini irəli sürmədi, biznesmen Hacı Salayev isə öncə namizədliyini irəli sürsə də, sonradan geri götürməli oldu. Bir neçə namizədin isə Milli Məclisə düşmək arzusu elə arzu olmaqdan bir addım da irəli getmədi.
Bunun ardınca "fövqəlnazir"in himayə etdiyi icra başçılarından biri – İsmayıl Vəliyev həm vəzifəsini, həm də azadlığını itirdi. 2011-ci ildən Neftçala rayonuna rəhbərlik etmiş Vəliyev, ötən həftə Dövlət Təhlükəsizliyi Xidməti tərəfindən keçirilən əməliyyat nəticəsində saxlanıldı. Onun mütəmadi olaraq vəzifə səlahiyyətlərindən sui-istifadə edib təhsil, səhiyyə və digər yerli dövlət təsisatları rəhbərlərindən müxtəlif adlar altında şəxsən pul vəsaitləri tələb edərək almasına əsaslı şübhələr müəyyən olunub.
K.Heydərov hökumətdə əvvəlki nüfuz və təsir imkanlarını qoruyub saxlamış olsaydı, yəqin ki, yaxın adamlarından birinin bu şəkildə "vurulmasını" önləyə bilərdi. Lakin bir az yuxarıda da qeyd etdiyimiz kimi, onun əvvəlki qüdrətindən əsər-əlamət qalmayıb.
"Fövqəlnazir"in ölkə daxilindəki və xaricindəki biznesi də əhəmiyyətli şəkildə sarsılıb. Azərbaycandakı gəlir yerlərinin bir çoxunu itirən Heydərovun ölkə hüdudlarından kənardakı obyektləri də arzuedilməz günlərini yaşayır. Məsələn, bir neçə ay əvvəl ona məxsus "Benkons Group"un Tatarıstandakı iki böyük layihəsini dayandırdığı məlum olmuşdu. Söhbət Kazanka çayı sahilində 20 milyon dollar investisiya dəyərində 13 ofislik biznes mərkəzi və 252 yerlik 4 ulduzlu oteldən ibarət kompleksin tikintisindən gedir. Bildirilirdi ki, "fövqəlnazirin" şirkəti eyni zamanda Tatarıstanın Laişevski rayonunda 4 milyard rubl (65 milyon dollar) investisiya dəyəri olan şirə zavodunun və logistika mərkəzinin tikintisindən də müəmmalı şəkildə imtina edib. Digər tərəfdən isə Heydərovun sahib olduğu geniş media gücü də artıq zəifləyib.
Bir sözlə, proseslər "fövqəlnazir"in böyük sürətlə sıradan nazir olması istiqamətindən gedir və təcrübə bu prosseslərin yaxın gələcəkdə onun postunu itirməsi ilə nəticələnəcəyini söyləməyə ciddi əsaslar verir. Hər halda bir çox nüfuzlu oliqarx-məmurlarla bağlı da biz oxşar ssenarini izləmişik; misal üçün, sabiq nəqliyyat naziri Ziya Məmmədov bir neçə ildə səlahiyyətlərinin və biznesinin əsas hissəsini itirdikdən sonra postundan kənarlaşdırılmışdı. İndi eyni aqibəti "fövqəlnazir"in yaşaması da kifayət qədər realdır. Yuxarıda sadalananlar azmış kimi, Heydərovun ətrafında ilginc bir qalmaqal da yaşanmaqdadır. Belə ki, nazirin biznes şəriki olan türk xanım müəmmalı şəkildə Azərbaycandan qaçıb. Adına vətəndaşı olduğu Türkiyədə bir çox ticarət obyektləri rəsmiləşdirilən həmin xanım "fövqəlnazir"in zəifləməsinin ardından ilginc fikirə düşüb: Heydərovun qardaş ölkədə onun adına olan biznesinin əsas pay sahibi olmağa qərar verib. Bu isə tərəflər arasında ixtilafa gətirib çıxarıb. Sonda isə xanım övladı ilə birlikdə Azərbaycandan getməyə qərar verib.
İddialara görə, qadın Türkiyə vətəndaşı olsa da, əsasən ölkəmizdə yaşayırmış və bunun üçün ona hər cür komfort imkan yaradılıbmış. Hətta sözügedən xanıma Ramiz adlı sürücüsü və mühafizəçi ayrılıbmış. Lakin belə görünür, o, "fövqəlnazir"in ətrafında həlqənin daraldığını görüncə öncədən başının çarəsinə baxmağa qərar verib: bu səbəbdən də de-yure onun adına olan biznes obyektlərinin həm də de-fakto sahibi olmaq üçün Türkiyəyə qayıdıb.
Bu qalmaqalın nə ilə yekunlaşacağını zaman göstərəcək. Hələliksə görünən odur ki, Kəmaləddin Heydərov üçün işlərin heç də yaxşı istiqamətdə getmədiyindən duyuq düşənlər artıq onun "gəmisini" tərk edirlər...
