Qısamənzilli hava müdafiə sistemlərinin istehsalçısı İjevsk Kupol zavodu Silahlı Qüvvələrin sifarişinin yerinə yetirilməsi barədə məlumat verib. Qeyd olunub ki, Qarabağ müharibəsindən sonra zavodun hərbi məhsullarına, xüsusən də “Tor-M2” komplekslərinə olan tələb artıb. Məlum olduğu kimi, 44 günlük müharibədə Azərbaycan Ordusu Türkiyə və İsrail istehsalı olan pilotsuz döyüş təyyarələri ilə Ermənistan ordusunu darmadağın edib. Bu mənada “Tor-M2” bütöv bir dron hücumunu dəf edə bilər.
Rus ordusu son aylar hərbi hava hücumundan müdafiə şöbələrinin altı bölməsi “Tor-M2U” və “Tor-M2” zenit raket sistemlərini silahlandırıb. Suriyadakı bir hücum əməliyyatında bu sistem pilotsuz təyyarələrə qarşı mübarizədə effektivliyini təsdiqləyib. Suriyadakı Xmeymim bazasının müdafiəsində “Tor”ların köməyi ilə terrorçular tərəfindən atılan yüzə yaxın pilotsuz təyyarə məhv edilib.
Qarabağ müharibəsi aşağı hündürlükdə uçan kiçik ölçülü dronların qəfil və kütləvi hücumlar üçün çox təhlükəli olduğunu göstərib. Əvvəllər bu taktika Yəmən üsyançıları tərəfindən Səudiyyə Ərəbistanındakı neft obyektlərinə hücumunda istifadə olunmuşdu. O zaman Amerika kompleksləri ilə silahlanmış səudiyyəli ərəblərin havadan müdafiə sistemləri heç bir şey edə bilmədi.
Yeni Torlar pilotsuz təyyarələrin məhv edilməsində xüsusi üstünlüyə qadirdir. Və özündə ən son texniki nailiyyətləri ehtiva edir. Kompleks cəmi 3 dəqiqəyə atəş vəziyyətinə gətirilir. Müqayisə üçün, Qərb tərəfdaşlarında bu rəqəm 10-15 dəqiqədir.
Bir “Tor-M2” eyni vaxtda dörd hədəfi atəş aça bilir. Sursatda 16 zenit idarəolunan raket yüklənir. Yəni dörd “Tor-M2” avtomobilindən ibarət bir batareya əllidən çox təyyarənin, helikopterin, qanadlı raketlərin, idarə olunan bomba və pilotsuz təyyarələrin basqınını dəf edə biləcək potensiala malikdir.
Kompleks hava hücumundan müdafiə radarlarının diqqətindən kənarda qalmaq üçün ultra aşağı – 10 metr və ya daha az hündürlükdə uçan hədəfləri də aşkarlayıb məhv edir. “Tor-M2″nin texniki imkan sahəsi ən azı 15 kilometr radius və 12 kilometrlik hündürlükdür. 2027-ci ilə qədər zavod Rusiya ordusunu “Tor-M2” kompleksləri və “Tor-M2DT”-nin Arktika versiyası ilə tamamilə təmin edəcəkdir.
“Moskovskiy komsomolets”, 25 dekabr 2020.
