Türkiyə ciddi zəlzələyə məruz qalsa da, bütün riskləri daima dəyərləndirir. Alternativ planları hər zaman var. Geopolitik kövrəkliyi görüb, baş verə biləcək təhdidləri müəyyən edə bilir. Türkiyə və Azərbaycanla belə bir gündə düşmənçilik edənlər uduzarlar.
Bu sözləri Axar.az-a ehtiyatda olan türkiyəli polkovnik Ünal Atabəy İran və Ermənistanın Azərbaycana hücum planı haqda yayılan informasiyaları şərh edərkən deyib.
O bildirib ki, əgər İran və Ermənistanın Laçına hücum planları varsa, bu onların qursağında qalacaq:
“Türkiyənin gücü hər zaman yerindədir. Silahlı Qüvvələrimiz eyni vaxtda 3-4 cəbhədə savaşacaq qabiliyyətə və imkana malikdir. Bu zəlzələni fürsət bilib, Ermənistan və İranın Laçın dəhlizi ilə bağlı qurmaq istədikləri oyun üzüntü ilə izlənilir. Əgər İran və Ermənistan belə bir addım atmağa cürət edərsə, Türkiyə və Azərbaycan dünyanı onların başına yıxar. Bundan əmin olsunlar. Qarabağın tamına nəzarət edəcəyimiz kimi, Zəngəzur dəhlizini də nəzarət altına alacağıq. Onların Laçınla bağlı qurduğu xəyalları baş tutmayacaq. Ermənistan avropalı dostlarına güvənməsin, çünki hesabını ağır ödəyə bilər”.
