Agentlik qida standartlarına cavab verməyən bu obyektləri bağlamaq yerinə rüşvət müqabilində onların fəaliyyətinə yaşıl işıq yandırır. Bu haqda “Gündəlik Naxçıvan”a rüşvət vermədikləri üçün obyektləri bağlanan bir qrup sahibkar məlumat verib.
Onlar deyirlər ki, təkcə “Kassap Döner” kafesində üç həftə ərzində 2 kütləvi zəhərlənmənin baş verməsini buna misal gətirmək olar. Agentlik əməkdaşları ilk kütləvi zəhərlənmədən sonra heç bir tədbir görmədiyindən, bir neçə gün öncə ikinci belə hal baş vermişdi.
Həmin sahibkarların sözlərinə görə, onlar qayda-qanuna riayət etdikləri üçün agentlik əməkldaşlarına rüşvət verməkdən imtina ediblər. Elə, bu səbəbdən də onların obyektləri bağlanıb. Lakin, təhlükəli qidalar satan sahibkarlar rüşvət verdikləri üçün onlara göz yumulur:
“Agentlik üçün fərq etmir: pulunu ver, işinə davam et. Standart tələbləri yalnız rüşvət istəmək üçün bəhanədir. “Kassap Döner” əvvəldən standartlara riayət etmirdi. Lakin, rüşvət alıb, göz yumdular, birinci zəhərlənmə baş verdi. Agentlik nə qədər arxayındır ki, zəhərlənmədən sonra da ikiqat rüşvət alıb, göz yumdu. Nəticədə 18 nəfərin zəhərlənməsinə səbəb olan ikinci hal baş verdi.
Agentliyin vəzifəsi qida təhlükəsizliyinə nəzarət etməkdir. Bunlar isə yalnız rüşvət yığmaqla məşğuldur. Şikayət etmək də olmur. Şikayət baxılmır. Elə iaişə obyekt, şadlıq sarayı, qəssabxana yoxdur ki, onlar oradan rüşvət almasınlar. Bəzilərindən aylıq alırlar, bəzilərinə isə istədikləri vaxt girib, istədikləri məbləği alıb gedirlər. Qəssabxanalarda satılan ətlərin heç biri yoxlanmadan, labaratoriyadan keçirilmir, satılan toyuq məhsulları, ərzaq məhsullarının hamısı elədir. Rüşvət alıb təsdiq edirlər”.
Şikayətçilər bildirirlər ki, rüşvət problemini ictimailəşdirən sahibkarlar müxtəlif yollarla cəzalandırırlar:
“Ən çox məhkəmə yolu ilə cəzalandırırlar. Son zamanlar onların rüşvət almasını ictimailəşdirən çoxlu sayda sahibkarı məhkəməyə verib, təhdid edib, geri çəkilməyə məcbur ediblər. İndi kimsə küllü miqdarda əsassız olaraq cərmələnmək, məhkəməyə düşmək istəmir. Çünki, məhkəmələr də haqlı, haqsız onların sözünü deyirlər. Bir sözlə, Naxçıvanda QTA vicdanlı işləyən sahibkarların qorxulu röyasına çevirilib.”
