Bölgədəki qanunsuz erməni silahlıları Suqovuşandan hərəkət edən Azərbaycan hərbi kalonunun qarşını kəsərək hərbçilərimizi Kəlbəcərə buraxmayıb.
Əraziyə gələn Rusiya Federasiyasının sülhməramlı kontingentinin danışıqları da heç bir nəticə verməyib. Hərbi texnikanın bir qismi yenidən Suqovuşana geri qayıdıb. İddia olunur ki, 1 həftə öncə də eyni hal baş verib və tikinti materialları aparan Azərbaycan kalonu bölgədəki qanunsuz erməni hərbçiləri tərəfindən Kəlbəcərə buraxmayıb. Qeyd edək ki, son zamanlarda erməni silahlı dəstələrinin ölkəmizə qarşı təxribat xarakterli addımları dayanmadan artmağa davam edir. Maraqlı məqam ondan ibarətdir ki, ermənilərin bütün bu hərəkətləri rus sülhməramlılarının gözü qarşısında baş verir. Əslində, Rusiya sülhməramlı kontingenti məhz bu hadisələrin qarşısını almaq üçün Qarabağa gəlib. Lakin artıq 1 ildən çoxdur ki, sülhməramlıların öz vəzifələrini icra etmədiklərini müşahidə edirik. Rus sülhməramlılarının ermənilərlə əlbir olması, onların etdiklərinə mane olmaması hiddətlə qarşılanır. Belə olan halda isə onların vaxtından əvvəl ölkəmizi tərk edib-etməyəcəyinin mümkünlüyü müzakirə olunmağa başlayıb.
Maraqlıdır, rus sülhməramlıları ilə bağlı məsələyə yenidən baxıla bilərmi? DİA.AZ-ın məlumatına görə, Böyük Azərbaycan Partiyasının (BAP) sədri Elşad Musayev Cebhe.info-ya açıqlamasında bildirib ki, son zamanlar beynəlxalq aləmdə Ermənistan-Azərbaycan məsələsi müzakirə olunmur:
“Yəni bu məsələ artıq dünyanın gündəm mövzusundan çıxıb. Ona görə də ermənilər bu məsələni gündəmə gətirmək üçün müxtəlif hoqqalar fikirləşirlər. Hətta son baş verən hadisə də bununla bağlıdır. Ermənilər istəyirdi ki, onlar yolu kəsdikdən sonra hadisə baş versin, amma gözlədikləri olmadı. Ümumiyyətlə, Azərbaycan tərəfinin bu məsələdə tutduğu yumşaq mövqe düzgün deyil. Hesab edirəm ki, istənilən halda Azərbaycan əsgərinə və ya mülki əhalisinə qarşısını kəsən erməni dərhal sərt şəkildə cəzalandırılmalıdır. Çünki ermənilər sadəcə o formada başa düşürlər.
Düşünürəm ki, ermənilərlə güzəşt dilində danışmağımız yanlışdır. Bundan sonra belə hadisə baş verən kimi Azərbaycan Ordusu dərhal erməniləri öz yerinə oturdurmalıdır”.
Partiya sədri qeyd edib ki, Azərbaycan tərəfi rus sülhməramlılarını vaxtından əvvəl ölkədən çıxara bilər:
“Fikrimcə, bu məsələ ilə bağlı Azərbaycan hakimiyyəti Rusiya qarşısında məsələ qaldırmalıdır. Azərbaycan bəyan etməlidir ki, bir daha belə hadisələr təkrar olunarsa, Qarabağda rus sülhməramlılarının qalmasına ehtiyac yoxdur. Əslində 10 noyabr Bəyannaməsi elə də ciddi bir müqavilə deyil. Çünki bu Bəyannaməni Azərbaycan Milli Məclisində təsdiq olunmayıb. Ona görə də Azərbaycan rus sülhməramlı qüvvələrini ölkədən çıxara bilər”.
