BAŞ VERMİŞ İNSİDENTLƏ BAĞLI VİDEOMAterial İCTİMAİYYƏTƏ TƏQDİM OLUNSA ÇOX MƏSƏLƏ AYDIN OLAR
Xəbər verdiyimiz kimi, Azərbaycan Müdafiə Nazirliyi Rusiya Müdafiə Nazirliyinin ötən gün Xankəndi-Xəlfəli-Turşsu torpaq yolunda baş vermiş silahlı insidentlə bağlı yaydığı bülletenə münasibət bildirib.
Müdafiə Nazirliyindən Publika.az-a bildirilib ki, Rusiya MN-in faktları təhrif edib və həqiqəti əks etdirməyən məlumat yayıb:
“Silah-sursatla tam təchiz olunmuş bu hərbi qulluqçuların “pasport və viza” xidməti həyata keçirən polis əməkdaşları kimi təqdim edilməsi riyakarlıqdan başqa bir şey deyildir.
Insident nəticəsində yaralanan hərbi qulluqçularımıza Rusiya sülhməramlı kontingentinin nümayəndələri tərəfindən ilkin tibbi yardımın göstərilməsi və təxliyə edilməsi barədə yayılan məlumat da həqiqəti əks etdirmir. Şəhidlərimizin və yaralı hərbçimizin ərazidən təxliyəsi hərbi qulluqçularımız tərəfindən həyata keçirilib”.
Xatırladaq ki, erməni tərəfin insidentin baş vermə anını əks etdirən videomateriala istinad edərək bildiriblər ki, insident zamanı erməni UAZ-ı Azərbaycan tərəfin əsgərlərinin dayanma əmrinə tabe olmadan yoluna davam etmək istərkən atışma baş verib. Nəticədə avtomobildə olanlardan 3-ü zərəsizləşdirilib, biri isə ağır yaralanıb. Fotodan da aydın görünür ki, hadisə yerinə gələn "sülhməramlılar" məhz ermənilərə yardım ediblər. Bəs bizim əsgərləri hadisədən sonra kimlər atəşə tutub? Bu sualın dəqiq cavabını isə Azərbaycan MN-də dron vasitəsilə çəkilmiş videomaterialı izləməklə cavab tapmaq olar. Rusiya MN-nin hadisəni riyakarcasına şərh etməsini isə Azərbaycan tərəfi sözdə deyil, faktiki olaraq sübut etsə yaxşı olardı.
