Xəbər verdiyimiz kimi, iyunun 13-də Vəhdət Partiyası növbədənkənar qurultay keçirərək, təşkilatda rəhbərlik dəyişikliyi həyata keçirib. Partiyaya uzunmüddətli sədrlik edən Tahir Kərimli vəzifəsindən istefa verib və onun yerinə sədr müavini Adəm İsmayıl Bakuvi seçilib. Bu dəyişiklik isə ictimai və siyasi çevrələrdə geniş müzakirələrə səbəb olub. Onu da bildirək ki, yeni sədrin şəxsi və peşəkar fəaliyyəti mediada geniş yer alıb. Son dövrlərdə politoloq, publisist, yazıçı və elmlər doktoru kimi tanınan A.İsmayılov 3 monoqrafiyanın, 20-yə yaxın elmi məqalənin və bir neçə romanın müəllifidir. Lakin onun fəaliyyəti yalnız akademik və publisistik sahələrlə məhdudlaşmır. Vəhdət Partiyasının yeni sədri ilə bağlı bir çox iddialar və qalmaqallar var ki, bunların başında da onun ad dəyişməsi gəlir. Belə ki, bu gün Adəm Bakuvi kimi cəmiyyətə tanıtdırılan şəxsin gerçək adı Aydəm İsmayılovur. Bu şəxslə bağlı cumhuriyyet.az olaraq media üzərindən apardığımız araşdırmalar isə daha ilginc məqamları ortaya çıxarır.
“Akula” Akif və Eldar Mahmudovla eyni çetedə
Keçmiş MTN-nin iş adamlarımızın başına gətirdiyi bütün oyunların içindən bu adam çıxır. Banklardan milyonlarla dollar alıb qaytarmaması məhkəmələr tərəfindən təsbit olunmasına, aldatdığı bir çox iş adamının ölkə rəhbərindən tutmuş hüquq mühafizə orqanlarına qədər müxtəlif instansiyalara müraciətlərinə, problemlərini mətbuat orqanlarında ictimailəşdirməsinə baxmayaraq, Aydəm İsmayılova “gözün üstə qaşın var” deyən olmayıb. Aydəm İsmayılov öz “mühafizə çətiri”ni yanında gəzdirmək üçün Eldar Mahmudovun “piyalə yoldaşı” “Akula” Akifə uzun müddət idarə etdiyi “Arena” ASC-də pulsuz ofis verir: “Arena” ASC-nin binasında yerləşən “EMPORİUM” oteldəki 101 saylı otaq Akula Akifin istifadəsində olmuşdur. Həmin otağın arxa tərəfə çıxışı olduğu üçün təhlükəsiz hesab edildiyindən, Aydəm İsamyılov və Akula Akif məhz bu otağı öz istifadələrində saxlamış, bütün görüşlərini burada keçirmiş və iş adamlarının başına birgə corab hörmüşlər.
Xoşagəlməz dedi-qodulara yol açan belə məlumatlardan biri iş adamı, MTK sədri N.Sadıqovun dövlət başçısına ünvanladığı və mətbuat orqanlarında dərc olunan müraciətidir. Həmin müraciətdə deyilir: “2010 cu ilin avqust ayında Bakı şəhəri Heydər Əliyev Prospekti 105, 195-ci məhəllədə 12 mərtəbəli binanın tikintisinə başladım. Aydəm İsmayılov bildirdi ki, Heydər Əliyev prospektində yuxarının razılığı olmadan heç kəs tikinti tikə bilməz. Aydəm İsmayılov bizdən tələb etdi ki, Mənzil Tikinti Kooperativinin 10 faizini Prezident Aparatının məsul şəxsinə, 20 faizini isə özü ilə yanaşı hörmətli generallardan birinə verilməlidir. Aydəmin dediyinə görə, həmin şəxslər dövlət adamları olduğu üçün şirkət payları onların adına olmaz və onların şəxsi nümayəndəsi kimi şirkətin 30 faizini öz adına, yəni Aydəmin adına sənədləşməsini bizdən tələb etdi”.
Ramiz Mehdiyevin çətiri altında
İsmayılov Mahmudovu itirdikdən sonra Mehdiyevə sığınıb. Cumhuriyyet.az olaraq dövri mətbuatda apardığımız qısa araşdırmalar onun “Green Park Azərbaycan” MMC-yə rəhbərlik etdiyini və keçmişdə Prezident administrasiyasının sabiq rəhbəri Ramiz Mehdiyevə yaxınlığı ilə seçildiyini üzə çıxarıb. 2017-ci ildə A.İsmayılovun tikinti şirkəti “A-3 Sənaye Tikinti Korporasiyası” MMC Yasamal rayon Mətbuat prospekti “Ovçular evi” ərazisində 54 ağacı qanunsuz kəsməsi ilə prezidentin qəzəbinə tuş gəlib. Aparılan araşdırmadan sonra yaşıllığı məhv etdiyinə görə, “A-3 Sənaye Tikinti Korporasiyası” MMC-nin sədri Aydəm İsmayılovun qardaşı Azər İsmayılov həbs edilmişdi. “A-3 Sənaye Tikinti Korporasiyası” MMC-nin direktoru Aydəm İsmayılovun həyat yoldaşı Dilşad İsmayılova idi. Lakin o zaman Mehdiyev heç cür kömək edə bilməyib, İsmayılovu qoruya bilməyib. Mediada tirajlanan iddialara görə, A.İsmayılov R.Mehdiyevə xoş gəlmək üçün “Tri Korono”dakı binalardan ev bağışlayıb. Həmin mənzil həbsdən yeni çıxan Mehdiyevin kürəkəni İlham Əliyevin yaxınlarının birinin adına rəsmiləşdirilib.
Bu fonda isə Aydəm İsmayılovun siyasi partiya rəhbərliyinə gətirilməsi cəmiyyətdə ciddi suallar doğurur. A.İsmayılov sədr seçildiyi qurultaydakı çıxışında Azərbaycan Respublikası Prezidentinin Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevə xüsusi şəkildə təriflər yağdırsa da bəzi siyasi şərhçilər bu təyinatı “boz kardinal” Ramiz Mehdiyevin siyasi nüfuzunu bərpa etmək cəhdi kimi qiymətləndirirlər. Yəni Vəhdət Partiyasındakı son dəyişikliklər sadəcə struktur dəyişikliyi deyil, eyni zamanda ölkə siyasətində köhnə nüfuz dairələrinin yenidən aktivləşməsi kimi də təhlil olunur. Sözügedən məsələdə Tahir Kərimlinin yerinə Ramiz Mehdiyevin adamının gətirilməsi isə adıçəkilən iddiaları genişləndirir.
Yazıda adıçəkilən şəxslərin mövqeyini dərc etməyə hazırıq.
Cumhuriyyet.az
