#AzərbaycanRespublikasınınBaşProkurorluğu
#prokurorluq
#Bakışəhərinizamirayonprokurorluğu
YAZI MEDİA ÜÇÜN AÇIQDIR.XAHİŞ EDİRƏM,PAYLAŞIB DƏSTƏK OLUN!
Dostluğumdakı media işçilərinə,sayt rəhbərlərinə,KİV əməkdaşlarına müraciət edirəm.Prokurorluq ölüm hadisəsi ilə bağlı şikayətimi ört-basdır edir,obyektiv,hərtərəfli araşdırma aparmır.Ona görə də bu məsələni ictimailəşdirmək qərarına gəlmişəm.
Fotolardan da gördüyünüz kimi prokurorluq heç olmasa özünə hörmət qoyub dövlətin adından verdiyi qərarı vətəndaşa normal şəkildə təqdim etməyi də özünə rəva görmür.Üstəlik də mətndə müstəntiqin çox sayda qrammatik səhvləri var.Rəsmi sənədin əsli və surəti səlis,dəqiq,dövlət dili normalarına uyğun tərtib olunmalıdır.Əgər müstəntiq Anar Namazov bunu başa düşmürsə,prosessual rəhbər,rayon prokuroru cənab Pərviz İbayev bunu bilməlidir.İndi mənə maraqlıdır,beş cümlədən bir səhvlər buraxan bir işçi necə obyektiv,dəqiq,hərtərəfli araşdırma apara bilər? İzahatımda və izahatıma əlavə yazdığım ərizədə göstərilənlərin bəziləri qərarın təsviredici hissəsində qeyd edilməyib.Amma qarşı tərəfin ifadəsində dəqiqləşdirilməsi tələb olunan cümlələr araşdırılmayıb.
Məsələn,həkim deyilən adam bildirib ki,20-26.11.2021-ci il arası müddətdə mənzilimizdə olub,anamı müayinə edib.Amma elə deyil,yalan danışır.Bu barədə müstəntiq Anar Namazovla iş otağında son söhbətimizdə də dedim.Həm də ərizəmdə təklif etmişəm ki bu adamla mənim aramda olan bütün telefon danışıqlarını,səs yazılarını,evimizin ətrafındakı nəzarət-müşahidə kameralarının görüntülərini prokurorluq sorğu verib araşdırsın.Yəni hərtərəfli araşdırma bu cür olmalıdır.Yoxsa,elə şablon üsulla işi ekspertizaya yönəldərək şablon rəy alıb şablon qərar verirlər.Mənim işimdə müstəntiq o şablonun da atasını yandırıb.Qərarda ekspertin rəyinə istinad olunmalı,qoyulan suallar,baxdığı məsələlər əks olunmalıdır.Mənə göndərilən qərarda isə sadəcə ekspert rəyinin nömrəsi və bir-iki ümumi cümlə yazılıb.
Qərarın bir yerində həkim Nəsibov Tarielin izahatında xəstənin COVİD testinin neqativ olduğuna və bronxlarında xışıltı eşitdiyinə görə kəskin bronxitə görə müalicə yazdığı bildirilir.Bu Tariel onu da yazıb ki ,əgər səhv müalicə etsə idi,xəstə dərhal və ya bir sutka ərzində vəfat edərdi...Normal müstəntiq üçün elə həkimin bu ifadəsi bəs etməli idi ki,şübhəli məqamları müəyyənləşdirsin.Amma müstəntiq ekspertizaya tələsib.
Qanunvericiliyimizdə də boşluqlar çoxdur.Obyektivliyi təmin etmək üçün alternativ ekspertizaya ehtiyac var.Bizdə heç kim zəmanət verə bilməz ki,müstəntiqlə ekspert sövdələşmirlər.Şikayətçi kimi ilkin araşdırmada izahat verilməsundən başqa heç nə tələb edə bilmirəm.Səhlənkarlıq,laqeydlik,etinasızlıq edən həkimlər də müstəntiq-ekspert tandeminə ümid edib deyirlər ki eksqumasiya etdirin.Yaxşı bilirlər ki heç kim öz doğmasının ruhunu narahat edib onun qəbrini açdırmaz.Müstəntiqlər də həkimlərin sağlamlığa ziyan vurmasının dərəcəsini yalnız ekspertiza ilə müəyyənləşdirməyə üstünlük verirlər.Halbuki digər metodlar da var.Özlərinə əziyyət verib beynəlxalq hüququ tətbiq edə bilərlər.
Qanunvericiliyimizdə boşluqlardan biri də bəzi əməllərə görə inzibati cəzanın nəzərdə tutulmasıdır.Elə mənim davamdakı kimi.Şikayət etdiyim həkim lisenziyasız,sertifikasiyadan keçməyərək,təkmilləşmə kurslarında iştirak etmədən,saxta resept blanklarından istifadə edərək pandemiya dövründə fərdi özəl tibb fəaliyyəti ilə məşğul olub.Bu adam faktiki olaraq həmin dövrdə həkim hesab edilməyib.Deməli qəsdən sağlamlığa ağır ziyan vurub.Amma qanunlardakı boşluq ,qarışıqlıq ona məsuliyyətdən yaxasını inzibati akt və 2 min manat cərimə ilə qurtarmağa imkan verir.Fikir verin,sertifikasiyadan,təkmilləşmədən keçməyib,deməli,həkim də sayılmırmış.Həmin vaxt özəl tibbi xidmət göstərərək saxta resept blankları ilə müalicələr yazıb.Deməli dövləti də,vətəndaşları da aldadıb,insanların taleyi ilə oynayıb.Ona görə də həmin maddələri İnzibati Xətalar Məcəlləsindən çıxartmaq,eyni əməllərə görə Cinayət Məcəlləsində məsuliyyət müəyyən olunmalıdır.
Mən dəfələrlə baş prokurorluğa Bakı şəhəri Nizami Rayon Prokurorluğu barədə iradlarımı bildirmişəm.Bu idarədə adi kargüzarlıq qaydalarına əməl olunmur.Dəftərxanadan işin nömrəsini öyrənənə kimi iki həftədən çox vaxtım getdi.Qapıda mühafizə adamla danışıq qaydasını bilmir,zəng vuranda heç kimlə əlaqələndirmir.Necə olur ki digər rayon prokurorluqlarında prosedurlara əməl olunur,amma Nizami rayonunda bunun əksi baş verir? Qəribə odur ki,baş prokurorluğun müxtəlif şöbələrinə zəng vurub Nizami rayon prokurorluğunun nömrələrini istəyəndə məlum oldu ki,əksərinin məlumatı yoxdur.Prokurorluğun rəsmi saytında da köhnə telefon nömrələri qoyulub.Yalnız dəfələrlə tələb edəndən sonra baş prokurorluğun hansısa şöbəsindən yeni nömrələri verdilər.
Son olaraq buradan baş prokuror cənab Kamran Əliyevə müraciət edirəm.Rəsmi qaydada qərardan şikayət də verəcəm.Xahiş edirəm ki,Bakı şəhəri Nizami rayon prokurorluğunun müstəntiqi Anar Orucəli oğlu Namazovun qərarını ləğv edərək işə yenidən baxılaraq dəqiq,obyektiv,ədalətli,hərtərəfli araşdırılmasını təmin edəsiniz.
