Muxtar Babayev Sumqayıtdan deputat idi. Parlamentdə dili-ağzı "olmayan" üzvlərdən sayılardı, nadir hallarda hansısa sınıq-salxaq mövzuda səsi eşidilərdi. Yəni media onu deputat kimi o qədər də fəal biri olaraq tanımırdı, mətbuatın yaddaşında böyük ölçüdə qalmamışdı. Sonra tale üzünə güldü və ona karyera qapıları açıldı, Hüseynqulu Bağırovdan bezmiş hakimiyyət Muxtar Babayev onun yerinə ekologiya və təbii sərvətlər naziri vəzifəsinə gətirdi. Bəh, deputatlıq hara, nazir postu hara, böyük bir struktur sənə tapşırılır, nəhəng sahə həvalə olunur, bunun meşə idarələri, ayrı-ayrı qurumları, yeyinti yerləri, yaşıllıqları və s.
M.Babayev "çiçəyi burnunda" nazir idi, yeni təyin olunmuşdu, onun çırmanıb köhnədən qalan problemlərə girişməyə isə nə həvəsi, nə gücü varıydı. Bunun üçün gərək böyük bir "mafiya"nı qarşısına alaydı. Lakin nazirə bu lazım deyildi və qaldığı yerdən işinə başladı: yəni əvvəl hansı qanunsuzluqlar olub, nazirlikdə və idarələrdə hansı "qanun"lar işləyib, bunları düzəltməyə gəlməmişəm, işinizi davam edin. Və bu minvalla M.Babayev nazir vəzifəsini yerinə yetirməyə çalışırdı. İnsafən, mediadan qaçan məmur deyildi, hətta jurnalistlərlə şəkil çəkdirir, suallarını cavablandırardı. Amma ekologiya sahəsində problemlər xirtdəyə qədər qalmışdı, nəyisə dəyişmək fikrində görünmürdü. Ona görə Ekologiya və Təbii Sərvətlər Nazirliyi yaşıllıqların qırılmasından tutmuş meşələrin kəsilməsinə qədər Bağırov dövründən fərqli fəaliyyətlə seçilmədi. Ancaq Gədəbəydəki Söyüdlü hadisəsi ilə bağlı prezident İlham Əliyevin çıxışı bəlkə də gözdən yayınan bir həqiqəti üzə çıxardı: nazirlik qızıl istismar edən şirkətlə sövdələşibmiş, "haqq" alıbmış...Prezident belə də dedi -Görünür, ya Ekologiya və Təbii Sərvətlər Nazirliyi ilə sövdələşiblər, ya da ki, onu özbaşına ediblər, ona görə ciddi araşdırılmalıdır.
Nə demək idi bu, belə məlum olur ki, istismarçı şirkət Nazirliyi "görüm-baxım" edib. Ona görə də zəhərli tullantıların atılması, ikinci göl yaradılması, bütün özbaşınalıqların edilməsinə göz yumulub. Əgər vaxtında nazir Muxtar Babayev Söyüdlü camaatının səsini eşitsəydi, ən azı hadisələr partlayış həddinə çatmazdı. Axı hakimiyyətə dəymiş bu zərbənin günahı həm də ETSN-nin susqunluğu olub. Kənd camaatı ilə görüşüb məsələni hansısa formada yoluna qoymaq olardı ki, nə aksiyalar olardı, nə bu qarşıdurma yaşanardı. Faktiki olaraq, nazir Babayev hakimiyyətə ictimai rəydə böyük pislik elədi. İqtidar rəhbərliyi bunu bağışlayarmı ? Çətin. Prezidentin son sözlərini şərh edəndə, böyük ehtimalla nazirin bir müddət sonra vəzifəsindən çıxarılacağını söyləmək olar. Belə desək, Babayevin "qələmi qırıldı". Əlbəttə, baş nazir Əli Əsədov da babat danlandı, amma ən çox nazirlik tənqid edildi. İyulun 12-də qaçaraq brifinq keçirib izahatlar verən, Söyüdlüdə sionid zəhəri olmadığını iddia edən, prezidentin tənqidlərini haqlı saydıqlarını bildirən nazir indi "saman çöpüyü"ndən yapışmağa başlayıb. M.Babayev bir həftə içində ölkə rəhbərliyinə nəticələri təqdim etməlidir. Əslində 1 həftə ərzində onun nazir postundakı aqibəti bəlli olacaq. Çünki hakimiyyətin başına iş açmış, hətta polis-xalq problemi yaratmış Ekologiya və Təbii Sərvətlər Nazirliyi Söyüdlü hadisələrinin vaxtında qabağını ala bilərmiş. Amma istismarçı şirkətlə sövdələşmə, onun özbaşına əməllərini gözardı etmə böyük başağrısı yaratdı. Odur ki, nazir üçün gerisayım başlayıb. Onun vəzifədə qalması "tükdən asılıdır".
Onu da deyək ki, ümumiyyətlə, 2018-ci ilin aprelindən Muxtar Babayevin qəfil heç kimin gözləmədiyi halda Ekologiya və Təbi Sərvətlər naziri təyin edilməsi ictimaiyyət tərəfindən birmənalı qarşılanmadı. Xatırladaq ki, buna qədər cənab Muxtar Babayev 2-3 il SOCAR-ın Ekologiya üzrə vitse-prezident vəzifəsində də işləmişdi. Amma onun bu təcrübəsi Azərbaycan boyda bir ölkənin ekoloji problemlərinin həll olunmasına kifayət edirdimi? Əsla.
Bəs Muxtar Babayevin bu təyinatından sonra ETSN-də nələr dəyişdi? Bəli, təsdiq etmək olar ki, ilk günlərdən nazirlikdə köklü kadr dəyişiklıkləri baş verdi. Muxtar Babayevin vaxtı ilə SOCAR-da çalışdığı bütün döst-tanışları, qohumların hamısını Nazirliyə transfer etdi. Onların hamısına demək olar ki, nazirlikdə bir sıra aparıcı vəzifələr tapşırıldı. Az keçməmiş nazirliyin Nəqliyyat və Kompleks Mexaniki Təminat İdarəsinin direktoru vəzifəsinə , əslən Qubadan olan həmyerlisi nazirin əmisioğlu kimi özünü bəyan edən Fizuli Babayev təyin edildi. Bir sözlə, o da tayfaçılıq maraqları çərçivəsində iş qurmuşdu. Ölkədə bir nazirin ənənəvi sistemidir - qohumları başına yığmaq və korrupsiyaya, maxinasiyalara yol vermək. Bu, ölkədə nazir obrazının portretidir....
Azər Talıbov
Anaxeber.info
P.S. Ölkə ictimaiyyətini hazırda 1 həftədən sonra ETSN nazirinin taleyinin necə olacağı düşündürür. Heçnə olmayacaq. Cənab nazir əvvəlki tək işinə davam edəcək. Çünki onu sifarişlə nazir təyin etdirən təşkilat ölkədən kənarda yerləşir. "Söyüdlü hadisəsi" bir daha sübut etdi ki, M.Babayevin əsas qazanc yeri ictimaiyyətin fikirləşdiyi kimi, heçdə ağac kəsintilərindən əldə edilən gəlir deyil, Əsas gəlir sabiq nazirin də 5 faizə ortaq olduğu mədənlərdən gələn gəlirlərduir. Elə Hüseynqulu Bağırovun imperiyasına baxmaq kifayətdir ki, bu gün M.Babayevin də qısa zaman kəsiyində sahib olduğu milyard varidatın mənbəyini müəyyən edəsən.
İfadetv.com
