22 ildir təcili yardım avtomobili sürürəm, 1 litr də olsun benzin verməyiblər
Şəki rayonun Baş Göynük kənd sakini, kənd Həkim Məntəqəsinin təcili yardım sürücüsü, müharibə veteranı Vəliyev Faiq Hüseynbala oğlu tərəfindən İdarə etdi yayarsız təcili yardım avtomobilinin yenisilə əvəzedilməsilə bağlı yuxarı orqanlara yazdığı ərizəyə görə Şəki rayon xəstəxanası rəhbərliyi tərəfindən sürücünü işdən çıxarmağa məcbur etməsindən yuxarı direktiv orqanlara və bir nüsxəsini də ifadetv.com saytına şikayət göndərmişdir. Şikayət region sakinləri üçün maraqlı olduğuna görə olduğu kimi dərc edirik:
Bir daha xatırladım ki, atam Hüseynbala Vəliyev ömrünün 40 ilini Baş Göynük kənd xəsətəxanasının təcili yardım avtomobilinin sürücüsü işləmiş və təqaüdə çıxdıqdan sonra peşəsini davam etdirmək üçün sükanı mənə vermişdir. Və hal-hazırda idarə etdiyim 99 JU 207 dövlət qeydiyyatı olan, 1984-cü il buraxılışlı UAZ markalı təcili yardım avtomobilini atam 20 il işlətdikdən sonra indi mən 22-ci ildir ki, birtəhər idarə etməyə çalışıram. Niyə birtəhər? Ona görə ki, son 3- ilə qədər rayonumuzun həm əhalisinə ( 10000 nəfər), həm də ərazisinə görə ən böyük kəndi olan Baş Göynük kəndinin asfalt yolu olmamış, insanlarımız uzun müddət yolsuzluqdan əziyyət çəkmişdir. Belə bir vəziyyətdə 36 il fasiləsiz istifadə olunan bir köhnə UAZ-ın hansı texniki vəziyyətdə olmasını məncə izah etməyə ehtiyac qalmır. Digər tərəfdən bu ilin mart ayına kimi sürücü kimi əmək haqqım 150 manat olmuşdur. İş ondadır ki, indi idarə etdiyim avtomobilin texniki cəhətdən tam yararsız vəziyyətdədir. Mühərrik normadan dəfələrlə artıq yağ işlədir, kuzanın sol bortu tamamilə çürümüşdür, ötürücü mexanizmi çox pis işləyir, təkərlərin vaxtı keçmiş, keyfiyyəti itmiş vəziyyətdədir. Dəfələrlə, istər vəfat etmiş şəxsləri morqa apararkən, istərsə də ağır xəstələri şəraiti olmayan həkim məntəqəsindən Şəki Mərkəzi Xəstəxanaya apararkən yolda avtomobilin hissələri sınıb qalmışıq. Nə rəhmətlik atamın dövründə, nə də indi mənim vaxtımda dövlətin ən vacib hesab edilən təcili yardım avtomobili üçün reallıqda heç bir detalı yenisilə əvəzlənməyib, hamısını öz cibimin xərcilə birtəhər yoluna qoyub avtomobili işlətmişəm. Bir balaca əvvəlki baş həkimlərə ehtiyat hissəsi üçün müraciət edəndə dərhal cavabım bu olurdu ki, işlədə bilmirsənsə get açarı təhvil ver. Mən də əlacsızlıqdan hər il şəxsi təsəsrrüfatımda bəslədiyim danaları böyüdüb satır və ən vacib detalları alıb avtomobili birtəhər işlədirdim. Son vaxtlar vəziyyət bir azda mürəkkəbləşib. Beləki, kənddə olan qoca və ağır xəstələrin vaxtında və operativ olaraq rayon mərkəzinə çatdırılması işi Baş Göynük kənd Həkim Məntəqəsinin işini təcili yardım avtomobilinin olmaması ucbatından mürəkkəbləşdirir ( ölüm halları artır) və yerli sakinlərin dövlətə qarşı narazılığı artmaqda davam edir.
Budur, etdiyim müraciətlərə 5 aydır ki, Səhiyyə Nazirliyi Şəki Mərkəzi Xəstəxanasına bu məsələilə bağlı cavab vermir.
Mənim 14 sentyabr tarixli sonuncu müraciətimdən sonra dünən 16 sentyabrda məni 3-cü dəfə etdiyim müraciətə görə Şəki rayon Xəstəxanasının rəhbər heyəti çağırıb əvvəlcə danladılar ki, maşının işləmirsə, get qoy Həkim Məntəqəsinin həyətinə, özün də ərizəni yaz rədd ol işdən. Baş həkim müavinlərinin bu sözünə cavab olaraq bildirdim ki, siz bu 22 ildə nə vermisiniz ki, belə asanlıqla məni işdən qovursunuz. 22 il ərzində nə 1 litr benzin verilib, nə bir dənə də olsun ehtiyat hissəsi verilib, maşının texniki baxış rüsumu, sığorta pulu verilib. Bütün xərcləri qarşılamaq üçün həyətimdə bəslədiyim erkək danaları satıb puluna həll etmişəm. Mən işdən çıxıram. Gətirin verin 22 danamı sonra maşın da sizə olsun, Allahın bəlası da. Mən, Qarabağ müharibəsi veteranıyam. Kontuziya almışam. Ermənilərlə döyüşdə bu qədər cəzalanmamışdım. İndi məni avtomobili yeniləmək barədə ərizə yazdığım üçün işdən əsassız çıxarmaq istəyirlər. Mən sizlərdən ötrü döyüşməmişəm ki, rahat kreslolarda oturub xəsətxananın avtoparkına dövlət büdcəsindən benzinə, ehtiyat hissələrinə, və s. görə ayrılan pulları mənimsəyib məni də aşağılayasan. Şükür olsun ki, mən çörəyimi kişi kimi qazanıb ailəmə verirəm. heç kimdən də qorxum yoxdur. Sonda məndən xahiş etdilər ki, 3 ay heç yerə yazma, görək bir avtomobil təşkil edə bilirikmi. 
Əvvəlcə nazir Sahil Babayevdən xahiş edirəm ki, Şəki rayon xəstəxanası rəhbərlərinin məni işdən əsassız olaraq qovmaqla hədləməsinin qarşısını onlara əmək qanunvericiliyini izah edərək başa salasınız ki, müharibə veteranlarını hansı halda işdən qovmaq olar.
Cənab müavinlərin mənə qarşı göstərdikləri tzəyiqlərə baxmayaraq Cənab Prezidentə, cənab Baş nazirə və cənab səhiyyə nazirinə yenə müraciət edirəm. Mən əsasən xəstə insanlarımızın əzab-əziyyətdən, ölümdən qurtarması və rahat formada 30 km məsafədə yerləşən Şəki Mərkəzi Xəstəxanasına vaxtında çatdırılması üçün işimi itirmək riskilə Sizlərə təkrar xahişlə müraciət edirək xahiş edirəm imkan varsa, Şəki rayonun Baş Göynük kənd Həkim Məntəqəsinin 36 yaşlı tam yarasız vəziyyətə düşmüş təcili yardım avtomobilini nisbətən yararlı digər avtomobillə əvəz edilməsinə köməklik göstərəsiniz.
Qarabağ müharibəsi veteranı: Vəliyev Faiq Hüseynbala oğlu
