Əgər Donald Tramp Ukraynanın Rusiya təcavüzünə qarşı qələbəsinin ABŞ-nin maraqlarına uyğun olduğunu etiraf etsə və Kiyevə bütün lazımi yardımları göstərsə, Rusiya bir il ərzində çökəcək. Bununla belə, yenə Ukraynanın Rusiyanın mümkün təkrar hücumundan etibarlı müdafiəyə ehtiyacı olacaq.
Bunu tanınmış amerikalı general, ABŞ-nin Avropadakı quru qoşunlarının keçmiş komandanı Ben Hoces Ukrayna mətbuatına açıqlamasında deyib.
General hesab edir ki, Tramp Putinin və Rusiya iqtisadiyyatının zəif durumunu nəzərə almalıdır: “Prezident Trampın nə edəcəyini təxmin edə bilmərəm. Amma düşünürəm ki, o, Putinin nə qədər zəif olduğunu və Rusiya iqtisadiyyatında vəziyyətin nə qədər ağır olduğunu dərk edə bilər. Əgər bunu başa düşsə, Çini cilovlamaq üçün ümid edirəm ki, o, Ukraynaya Rusiyanı məğlub etməyə kömək edə bilər”.
Eyni zamanda, Hoces xatırladıb ki, Ukrayna coğrafi mövqeyinə görə hadisələrin mərkəzində qalmaqda davam edəcək. Bununla bağlı general vurğulayıb ki, Ukraynanın Rusiyanın mümkün yeni təcavüzlərindən qorunması məsələsinə yalnız onun NATO-ya daxil olmasından sonra və ya Ukrayna ərazisinə mühüm Qərb hərbi kontingentinin yerləşdirilməsi şərti ilə baxıla bilər: “Əgər Ukrayna NATO-dadırsa və ya onun ərazisində güclü Amerika və ya Avropa mövcudluğu varsa, o zaman daha güclü mövqedə ola bilər. ABŞ Prezidenti üçün ən vacib addım Ukraynanın Rusiyanı məğlub etməsinin Amerikanın marağında olduğunu anlaması və “biz Ukraynanın qalib gəlməsi üçün lazım olan hər şeyi edəcəyik” deməsi olardı. O bunu etsə, Rusiyanı bir il ərzində kollaps gözləyir”.
