VƏ YAXUD, MOLLANIN MARAĞI TƏMİN OLUNANDA, KÖPƏYi DƏ "DƏXİ O DA BİZİM BİRİMİZ" HESAB EDİR
Azərbaycan Respublikasının Mədəniyyət naziri cənab Adil Kərimliyə “ 2012-ci ildə Cinayət Məcəlləsinin 179.3.2 maddəsi üzrə məhkum edilmiş 65 yaşlı Rəsulov İbrahim Allahyar oğlunun hansı zərurətdən Şəki 4 saylı uşaq musiqi məktəbinə 1 aprel 2024-cü ildə yenidən direktor təyin edilmiş» barədə 17 may 2024-cü il tarixində göndərdiyimiz informasiya sorğusuna cavab verilmədiyi üçün bu istiqamətdə apardığımız araşdırmanı dəyərli oxucularınızın diqqətinə çatdırmaq istəyirik. Belə ki, etibarlı qaynağımızın redaksiyamıza təqdim etdiyi rəsmi sənəddən aydın olmuşdur ki, 2001-2004-cü illərdə Şəki şəhər Mədəniyyət şöbəsinin müdiri işləmiş, külli-miqdarda ( 55000 manat) dövlət əmlakını mənimsədiyinə görə 2004-cü ildə vəzifəsindən kənarlaşdırılan və 2012-ci ilin 12 oktyabr tarixli Şəki Ağır Cinayətlər Məhkəməsinin hökmü əsasında Azərbaycan Respublikası Cinayət Məcəlləsinin 179.3.2 maddəsi üzrə 7 il azadlıqdan məhrum edilmişdir.Sonradan hakimlərin marağı dairəsində hökmün əsassız olaraq 5 il şərti cəza ilə əvəz edilərək məhkum edilmiş 65 yaşlı Rəsulov İbrahim Allahyar oğlunun hansı zərurətdən Şəki 4 saylı uşaq musiqi məktəbinə 1 aprel 2024-cü ildə yenidən direktor təyin edilməsi hazırkı kollektiv arasında da birmənalı qarşılanmamışdır.
Əvvəlcə 5 il məhkum ola ola 2012-ci ildən 2021-ci ilədək yenə 4 saylı uşaq musiqi məktəbinə direktor vəzifəsində rəhbərlik edən İbrahim müəllim Rəsulovun iş fəaliyyəti 2021-ci ildə Maliyyə Nazirliyinin yoxlama komissiyası tərəfindən araşdırılan zamanı yenə də dövlət vəsaitinin mənimsənilməsi kimi ciddi maliyyə maxenaiyalarına yol verildiyi aşkar edilmiş və məhkum direktor yenə vəzifəsindən azad edilmişdir.İ. Rəsulovun bu dəfə yaxın çevrəsinə etdiyi etirafa görə 24000 manat xərcə düşdükdən sonra birtəhər vəzifəsindən kənarlaşdırılmaqla həbsdən qurtara bilmişdir. Doğrudur, müəllim kimi fəaliyyətini davam etdirsə də “yaxşı oğlan” adını aldığına görə onun vəzifəsinə Mədəniyyət Nazirliyi tərəfindən kimsə təyin edilməmiş, vacant yer kimi saxlanılmışdır.
Cari ilin aprelin 1-dən Mədəniyyət naziri cənab ADİL Kərimlinin əmri ilə İ.Rəsulov iki dəfə 2004 və 2021-ci ildə külli-miqdarda dövlət vəsaitini yaxşı mənimsədiyi nəzərə alınaraq məhkum mədəniyyət işçisi yenidən Şəki 4 saylı uşaq musiqi məktəbinə direktor vəzifəsinə təyin edilmişdir. Bəri başdan qeyd etmək yerinə düşərdi ki, belə bir vəzifəyə təyin etmə hoqqabazlığı yalnız Azərbaycanda baş verə bilərdi. Və bunun da şahidi olduq.
Doğrudur, biz hörmətli Adil müəllimə yazdığımız informasiya sorğumuzda onu da xatırlatdıq ki, məşhur korifey sənətkarlarımızın doğulub boya başa çatdığı Şəki rayonunda doğrudanmı bir ziyalı mədəniyyət işçisi tapılmadı ki, siz yenidən iki dəfə vəzifə səlahiyyətlərindən süi-istifadə edərək dəfələrlə külli-miqdarda dövlət əmlakını talan edən İbrahim Rəsulovu yenidən məktəb direktoru təyin etmək zorunda qaldınız?
Bəli, Adil müəllim sorğumuzu cavablandırmasa da ona xatırlatmaq istəyirik ki, “Zər qədrini zərgər bilər”. Və təbii ki, müasir dövrüçümüzdə orta məktəb şagirdinə də gün kimi aydındır ki, cənab nazirin bu təyinatının arxasında hansı konkret maraqlar durur. Belə kadr seçimlərinin nəticəsində mədəniyyətimiz yox, yalnız korrupsiyamız çiçəklənə bilər, başqa heçnə. İnanırıq ki, Azərbaycan Respublikasının prezidenti cənab İlham Əliyev mədəniyyət sahəsində yol verilən bu kimi ciddi qanunpozuntularıilə bağlı tədbirlərin görülməsi üçün öz qəti tapşırığını verəcəkdir.
P.S. İnformasiya sorğumuza cavab verilməsə də, qarşı tərəflərin də söz haqqı tanınır.
İfadetv.com-un araşdırma qrupu
